Beteja e Koshares

nga Albin Kurti*

Sot u bënë 26 vjet prej mëngjesit të hershëm të 9 prillit të vitit 1999, kur filluan luftimet në brezin kufitar përgjatë kufirit të vendosur dhunshëm mes Shqipërisë dhe Kosovës nën Jugosllavi, që do të njiheshin si Beteja e Koshares.

Për dy muaj rresht, deri më 10 qershor 1999, mbi 2000 pjesëtarë të UÇK-së, do të luftonin me forcat e ushtarake serbe në një vijë disakilometërshe. Një numër shumë i madh dhe ende vështirë i llogaritshëm i ushtarëve serbë, prej disa qindrash, do ngelnin të vrarë dhe të plagosur nga këto luftime, për çka këto shifra deri sot janë munduar të fshihen larg publikut nga autoritetet serbe.

Ushtarë të UÇK-së nga gati të gjitha zonat e Kosovës dhe trevat shqiptare, do të përfshiheshin në operacionet e Betejës së Koshares, duke e luftuar kufirin e padrejtë dhe ndarës mes shqiptarëve, të vendosur që më 1913, respektivisht më 1918.

Oficerë dhe ushtarë të ushtrisë së Shqipërisë dhe trupa aleate të NATO-s, do t’i ndihmonin nga prapashpina e kufirit shqiptar dhe nga ajri njësitet e UÇK-së, kundër trupave jugosllave. Komandantë, oficerë dhe ushtarë të UÇK-së, gjithsej 114, ranë dëshmorë, kurse mbi 400 të tjerë u plagosën, duke e dëshmuar çlirimin dhe lirinë e Kosovës.

Historia dhe kujtimi i tyre do të nderohet përgjithmonë. Mes nderimesh për dëshmorët dhe mirënjohjes për të gjithë pjesëmarrësit e Betejës së Koshares. Lavdi!

*Kryeministër i Kosovës