“Beteja për Kamzën”, Kotarja: Rakip Suli ilegjitim!

Mbështetësit e Partisë Demokratike të vendosur para Bashkisë Kamzë me mesazhet “Kamza blu”, “Turp Mister 6%”, “Asnjë hap pas” etj. i bënë të qartë kryetarit të ri të bashkisë që do Edi Rama, Rakip Sulit, se nuk do të futet në bashki.

Nga ana e tjetër, i zgjedhuri i 30 Qershorit si kryetar bashkie, Rakip Suli bëri betimin në ambientet e shkollës “Hillary Clinton”, ku u bë dhe konstituimi i Këshillit Bashkiak të Kamëz, u nis drejt bashkisë por më pas devijoi duke shmangur përplasjen.

Në situatën e krijuar, para Bashkisë Kamzë doli Nënkryetari i bashkisë, Tomorr Kotarja duke e vlerësuar Rakip Sulin ilegjitim tha se uzurpatorët do të marrin përgjigjen e merituar.

“Kryetari i ri i emëruar është ilegjitim. Sot është një ditë e zezë për demokracinë. Paligjshmëria po kthehet në ligj. 30 qershori ishte nul.  Xhelal Mziu është në krye të detyrës. Qytetarët nuk e meritojnë këtë farsë. Uzurpatorët do të marrin përgjigjen e merituar.” 

Ndryshe, Këshilli Bashkiak i Kamzë zhvilloi sot mbledhjen konstituive me urdhër të Prefektes së Tiranës, Suzana Jahollari, pëkundër vendimit kushtetues të Sekretarit aktual të Këshillit i cili kishte përcaktuar datën 14 Gusht. Për shkak të këtij veprimi kriminal, Partia Demokratike ka paditur Prefekten e Tiranës, Suzana Jahollari.

Këshilli Bashkiak i Kamzës i dalë ng zgjedhjet e 30 Qershorit përbëhet nga 41 anëtarë: 40 anëtarë Aleanca për Shqipërinë Europiane, 1 Bindja Demokratike.