Beteja për orën 18:00, Sali Berisha kërkon ndjesë nga “Foltorja”
Lideri historik i Partisë Demokratike, Sali Berisha, përkundër angazhimit të Kryetarit të PD, Lulzim Basha, Kryeministrit Edi Rama dhe Ambasadores së SHBA, Yuri Kim për të shpërqendruar vemendjen nga “Foltorja për një Parti Demokratike më të bashkuar, më të fortë, më të hapur” humbën betejën me orën 18:00 ndonëse dolën në të njejtën me kohë me Berishën. Angazhimi i kësaj treshe në Parlament dhe VOA si dhe mesazhi i Berishës me ndjesën që kërkoi ai para demokratëve për mbështetjen e Bashës, bëri që radhët e “Foltores” dhe interesimi i opinionit publik të jetë shumë më i madh.
Kështu, lideri historik Sali Berisha duke shfrytëzuar performancën e gabuar të treshes Antiberishë, në kulmin e interesit publik e bëri të qartë se qëllimi i këtij takimi ishte së pari për të kërkuar ndjesë publike ndërsa Lulzim Bashën e quajti Ish-Kryetar.
“Lulzim Basha në një akt të pashembullt të një shteti, diktatorial apo jo, pa pyetur asnjë njeri, del dhe komunikon përjashtimin e Sali Berishës, duke i futur një thikë pas shpine të gjitha parimeve mbi të cilat është ngritur PD. Ai i futi një thikë pas shpine të gjitha forumeve të PD-së. Kujt i futi thikën tjetër ai? Ju, anëtarëve të PD. Vullnetit tuaj të shprehur në statutin e PD, të shprehur në delegatët, në forumet e partisë. Në Këshillin Kombëtar, te deputetët. Ai i asgjësoi të gjitha. Prandaj ja ku jemi, por tani vendoseni veten në pozitat e dy zgjedhësve. Njëri prej tyre ka votuar PS, tjetri ka votuar PD-në. Votuesi i PS do i thotë atij të PD se këta të tutë qenkan pa parime, se këta i fusin thikën në shpinë tjetrit, se ai që keni votuar për kryeministër, nuk njeh sovranitetin dhe nuk respekton ligjet dhe rregullat e një vendi,” tha Berisha duke mohuar se ishte pjesë e vendimeve të Lulzim Bashës për 8 vitet që kaluan:
“Ne jemi mbledhur së pari për të kërkuar një ndjesë publike. Këto ditë kam takime me demokratë nga mëngjesi deri në darkë. Të gjithë më kanë thënë hapur se atë nuk e kemi dashur, por e kemi mbështetur sepse e mbështet Doktori. Ua them me sinqeritet absolut se me këtë përmasa nuk e njihja atë. Unë i kisha mbyllur hesapet dhe punoja nga mëngjesi deri në darkë vetëm për interesa të PD dhe të shoqërisë. Në 8 vite, ju garantoj se në 8 vite janë me gishtat e dorës njerëzit që kam promovuar apo lançuar në PD.
Por ka ndodhur një spastrim i heshtur i të gjithë atyre që kanë punuar me mua, por unë asnjëherë nuk i thashë. Çdo anëtar i PD-së duhet ta dijë se kam qenë përpara tij vetëm avokat i tyre. Nuk jam pajtuar asnjëherë, por si njeri i betuar që nuk do kthehem, isha betuar se njëri po mbetej, unë do isha i dyti. Unë nuk kisha projekt,” tha nga “Foltorja” lideri historik i PD, Sali Berisha, duke përfunduar:
“Për interes të karriges së tij, ai ka deklaruar te të huajt dhe shqiptarët se ‘unë nuk i marr vendimet, por i merr Berisha!”
