Beteja për Panjshir vazhdon, shefi i shërbimit sekret pakistanez në Kabul

Luftime të ashpëra të talibanëve me rezitencën politiko-ushtarake në Panjshir vazhdojnë përkundër lajmit që dhanë dje talibanët se ai kishte rënë dhe i gjithë Afganistani është nën kontrollin e tyre. Sot talibanët shprehen se po përparojnë në Panjshir, rezistenca politiko-ushtarake se po mbahet fort në pozicionet që ka ndërsa shefi i shërbimit pakistanez, ISI, që ka një ndikim të madh tek talibanët po viziton Kabulin.

Amerikanët dhe shërbimet tjera të huaja që veprojnë në Afganistan me vite të tëra janë shprehur se ISI ka ndikim të madh tek talibanët dhe vizita e shefit të shërbimit sekret pakistanez, gjeneral Faiz Hameed, në Kabul, konsiderohet si shenjë e parë e ndikimit edhe më të madh të Pakistanit në të ardhmen e Afganistanit.

Talibanët, që edhe sot kanë shtyrë formimin e qeverisë së re, vazhdojnë me luftime të ashpëra kundër rezistencës politiko-ushtarake për Panjshirin, në krye të së cilës është Ahmad Massoud, djali i liderit të Aleancës së Veriut, i cili u bë dhe simbol i luftës kundë Bashkimit Sovjetik, e më vonë talibanëve.

Agjencitë raportojnë se luftimet që filluan dje, ku u ndërprenë të gjitha komunikimet nga talibanët duke përfshirë dhe furnizimin me ushqim dhe linjat me celular, kanë marrë jetën e 50 luftëtarëve nga të dyja palët, talibanët madje festuan mbrëmë edhe fitoren por sot raportet nga vija e parë e frontit bënë që “fituesit” të zbrapsen nga suksesi i madh duke theksuar se luftime të ashpër po zhvillohen në disa vende të kësaj krahine.

“Kurrë nuk do të heqim dorë nga lufta për Zotin, lirinë dhe drejtësinë,” ishte mesazhi i qartë i Ahmad Mossoud përmes rrjetit social Facebook, një ditë pasi talibanët e akuzuan se kishte ikur në Taxhikistan ndërkohë mbështetësit e Mossoudit i bënë thirrje popullit afganë për kryengritje të përgjitshme kundër talibanëve.

Ndryshe, të dyja palët me ndërmjetësimin e Ish-Presidentit Hamid Karzai u munduan të zgjidhin konfliktin me negociata por pas disa ditësh ato dështuan për shkak të dallimeve thelbësore.

Me Ahmad Mossoudin rezistencën e drejton edhe Zv/Presidenti i Afganistanit, Amrulah Saleh, i cili u paraqit nga një vend i panjohur duke premtuar vazhdimin e rezistencës.

Pas rënies së Afganistanit në duart e talibanëve, Mossoud ka kërkuar ndihmë nga Shtetet e Bashkuara dhe Perëndimi për ta drejtuar rezistencën nga Panjshiri, por kjo kërkesë ka ra në vesh të shurdhër.