Beteja për shembjen e regjimit/ Koplik, Basha: Edi Rama ka instaluar diktaturën e krimit!

Kryetari i Partisë Demokratike, Lulzim Basha, tha nga Kopliku se kryeministri Edi Rama ka ngritur një diktaturë të re, atë të krimit, duke shtuar se synimi i opozitës është rrënimi i sistemit të ngritur prej tij

“Edi Rama ka instaluar një diktaturë të re, jo më marksiste dhe staliniste por diktaturë të kriminelëve. Kjo është arsyeja pse nuk gjejnë mundësi të rinjtë për punësim. Beteja që kemi nisur nuk është thjesht për largimin e Edi Ramës,” tha Lulzim Basha pas takimeve që zhvilloi  me biznesin dhe qytetarët në Malësinë e Madhe duke konstatuar se regjimi i Edi Ramës është një regjim i mbaruar politikisht, prandaj vërtitet si kufomë politike dhe mendon se do t’ua marrë mend shqiptarëve me batuta.

“Beteja jonë është shumë më shumë se largimi i tij. Beteja jonë është për të shembur regjimin që ka ngritur në themel, që nesër të mos jenë më 5 oligarkë që bëjnë ligjin nga jugu në veri,” theksoi lideri I Opozitës duke shtuar se tashmë

qytetari i thjeshtë nuk mund të ecë përpara pa ulur zverkun ndaj bandave.

“Po nuk u bëre skllav i bajraktarit të Rilindjes nuk ecën përpara!”

Dhe opozita pati dy mundësi, tha kryetari I PD, Lulzim Basha, ose të rreshtohej krah bandës që ndodhet në pushtet ose krah njerëzve të thjeshtë, dhe djegia e mandateve provoi se ata janë me popullin e thjeshtë:

“Me Edi Ramën nuk ka zhvillim, nuk ka përparim ndaj largimi i tij është emergjencë kombëtare, është akt i domosdoshëm.  Nuk ka për të pasur Shqipëri në Europë nëse nuk largohet kjo bandë hajdutësh. Kemi pasur dy mundësi të rreshtohemi krah bandës dhe tjetra të rreshtohemi krah jush. PD e mori vendimin, dogji mandatet dhe u rreshtua krah jush. Zgjedhje fasadë nuk ka për të pasur më.”

Pas Malësisë së Madhe,  kryetari i PD, Lulzim Basha, do të zhvilloj takime edhe në Shkodër,  ku nesër do të merr pjesë në ceremoninë e përkujtimit të Masakrës së 2 Prillit. Turi i takimeve në prag të Protetës së Madhe të 13 prillit para kryeministrisë, do të vijoj.

Gjatë bashkëbisedimit me disa biznese të vogla në Koplik Lulzim Basha premtoi ulje taksash dhe parandalimin e largimeve nga vendi.

Tregtari: Kemi frikë me dal në Shkodër me pi kafe.

Basha: Dhe po thonë që bandat po hanë kokën me njëri-tjetrin. Kjo është përgjigja që jep policia. Po policia për çfarë paguhet?

Tregtari: Po ku e di unë. Ndoshta duke kaluar rrugës po më kapin mua!

Basha:  Edhe ka ndodhur me njerëz të pafajshëm. Ajo vrasjet duhet zbardhur sepse janë përfshirë njerëz të pafajshëm, të cilët kanë dhënë kontribut për Shkodrën dhe demokracinë. Kjo nuk mund të vazhdojë më kështu, ose për ndryshe ka gisht shteti, se s’ka rrugë tjetër. Drejtësi nuk ka, mundësi nuk ka dhe kjo i ka sjell njerëzit në dëshpërim.

Tregtari : “Kemi një krizë shpirtërore. Janë duke ikur edhe familjarët, jo vetëm të rinjtë”

Lulzim Basha: Hera e parë që vij këtu tek ti. Sa kohë ke që e ke hapur këtë dyqan?

Tregtari : Që në 2010. Të punësum kam pasë para 3 viteve, por tani e largova, se s’kam me i pagu rrogat e sigurimet. Jena në një situatë që para 3 viteve, gjimnazi ka pasë 700 nxënës, sot 350. Përveç krizës së nxënësve, është edhe kriza shpirtërore. Janë duke ikur edhe familjarët, jo vetëm të rinjtë. Jam 30 vjeç, me diplomë e nuk shoh asnjë perspektivë. Situatë është e vështirë, por me ndihmën e Zotit, shpresoj të bëhet më e mira.

Basha: Me ndihmën e Zotit, por edhe me punën e njerëzve të ndershëm. Por është e vështirë, sepse tani nga 1 apo 2 taksa, paguani 5-6 taksa e tarifa. Edhe niveli i taksave është shtu. Kemi represion shtetëror mbi biznesin. E dyta, gjithçka që mund të shesim, e kanë uzurpu vetëm 2 njerëz. Gjithçka shkon në duart e këtyre dy njerëzve. me këto goditje, do ishte shkatërruar ekonomia gjermane, jo ekonomia jonë. Kjo situatë përcillet tek e gjithë ekonomia. Familjet zhyten në borxh e detyrohen të emigrojnë. Prandaj duhet çlirim, ndryshim i madh dhe ta përqafojmë të gjithë këtë ndryshim. Jo vetëm PD, por edhe biznesi i vogël, të gjithë. Ky sistem duhet shembur. Duhet shembur sistemi, pasi Rama është i rënë, ai i pari e di këtë.

Më pas Basha u takua me një bukëpjekës, ku theksoi dhe sfidën kryesore të opozitës: Ndalimin e hemoragjisë së largimeve!

Bukëpjekësi: Po ecën shumë keq. Shumë njerëz kanë ikur nga Malësia e Madhe. Gjithçka ndikon tek konsumi. Plus që taksat e reja na detyrojnë që çdo ditë të largojmë punëtorët që kemi pasur. Në Koplik janë 3 bukëpjekës dhe të gjithë janë në të njëjtën situatë.

Lulzim Basha: Ne duhet të ndalim hemoragjinë e largimeve. Para një muaji e gjysëm ishim në Hot dhe atje ishte mbyllur shkolla krejt. Prindërit qanin. Dhe nuk bëhet fjalë për një vend të varfër. Vendi ynë i ka të gjitha mundësitë të mbajë popullsinë aktuale por edhe ta dyfishojë, prandaj prioritet është kthimi i rritjes ekonomike, i cili hap edhe vende pune. Kjo do të jetë një nga sfidat tona kryesore. Do keni mbështetjen tonë totale.

Taksa e vetme që do paguani me qeverinë e Partisë Demokratike do të jetë 0,5 % e xhiros, taksë e përbashkët vendore dhe qendrore. Kështu që ju sdo ta keni mendjen tek rryshfeti që kërkon shteti, por do ta keni mendjen vetëm të punoni e të prosperoni.”