Betejë pa kthim, Basha: Nuk bëjmë pazare me të keqen. Duhet të ikë!

Marshimi i opozitës përfundoi ashtu siç paralajmëroi që në momentet e para të protestës, Kryetari i Partisë Demokratike, Lulzim Basha, si marshim historik, si marshim i lirisë, demokracisë, kundër dhunës qeveritare.

Në mbyllje të marshimit opozitar, duke falënderuar qytetarët për pjesëmarrjen dhe qëndresën, pavarësisht reshjeve të shiut, Lulzim Basha e bëri të qartë se nuk ka forcë ti detyrojë të ulen dhe të bëjnë pazare e kompromis me të keqen, e keqja duhet të ikë:

“Mirënjohje për ju zonja dhe zotërinj, motra dhe vëllezër. Shqipëria dhe Europa nuk e kishte njohur këtë qëndresë.

Për mbi 3 orë litarët e shiut e lidhën shpresën tuaj, me besimin në Zot, se Shqipëria nuk do të kthehet më kurrë atje ku ishte 3 muaj më parë. Mirënjohje për qindra mijëra burra dhe gra, të rinj e të reja, edhe për të gjithë agjëruesit, Zoti jua shpërbleftë për sakrificën, nga Vlora, Shkodra, Devolli, Korça, Kukësi, Dibra, Hasi e Mati.”

Në përfundim, tha lideri i opozitës, jemi edhe më të vendosur për të sakrifikuar gjithçka për lirinë:

“Sot treguam se nuk ka forcë të ndalë për kauzën tonë zgjedhje të lira e të ndershme se nuk ka forcë të na detyrojë të ulemi të bëjmë pazare e kompromis me të keqen, e keqja duhet të ikë. Me një kohë kaq të shkurtër, me një njoftim prej 24 orësh, me mbi 3 tre orë, nuk na pengoi shiu i bekuar. Në përfundim jemi edhe më të vendosur për të sakrifikuar gjithçka për lirinë,” tha Kryetari i PD, Lulzim Basha duke vlerësuar se misioni opozitar është mission brezash: 

“Forca jonë është pjesëmarrja dhe vendosmëria dhe kësaj force nuk i bën dot ballë Edi Rama. Misioni ynë është mision brezash, për të gjithë ata të djathtë dhe të majtë që sot e kanë kuptuar se vetëm përmes bashkimit, do të mund ta gjejnë të ardhmen e tyre. Ju ftoj ta përmbyllim këtë marshim-proteste.”