Betohet Kyriakos Mitsotakis, premton vende të reja pune dhe paga më të larta

Kyriakos Mitsotakis, sot, pasi u betua për mandatin e tij si kryeministër, me fitoren bindëse qytetarëve u premtoi se do të hap vende të reja pune, do të rris pagat dhe të ardhurat shtetërore si dhe performancë kreditore më të mirë të Greqisë.

Partia e tij e qendrës së djathtë, Demokracia e re, në zgjedhjet e përsëritura që u zhvilluan dje mori 40.5 për qind të votave ose 158 nga 300 ulëse sa ka Parlamenti i Greqisë, që është 20 për qind më shumë vota nga partia e majtë Syriza e cila ka drejtuar vendin nga viti 2015 deri në vitin 2019, duke përfshirë dhe periudhën e kulmit të krizës ekonomike e cila zgjati dhjetë vite. 

“Jam zotuar se në mandatin e dytë do të realizoj ndryshime të mëdha që janë aq shumë të duhura për vendin,” tha Mitsotakis para Presidentes Katerina Sakellaropoulou pasi mori zyrtarisht mandatin për formimin e qeverisë.

Ish-bankieri i njohur grek 55-vjeçar dhe trashëgimtari i familjes së fuqishme politike, në postin e kryeministrit është nga viti 2019 deri sa nuk dha dorëheqje, pasi nuk arriti të fitoj shumicën në zgjedhjet e 21 majit.

Ndryshe, zgjedhjet e djeshme ishin një humbje e thellë për Syrizan e Alexsis Tsipras, e cila humbi më shumë se 30 ulëse parlamentare. Në parlament janë futur tre parti të ekstremit të djathtë, në mesin e të cilave edhe Spartanët antiemigrantë. Kanë fituar gjithsej 35 ulëse parlamentare.