Biblioteka Kombëtare e Kosovës, sot nis edicioni i 22-të i Javës së Bibliotekës

Biblioteka Kombëtare e Kosovës “Pjetër Bogdani” nis sot edicionin e 22-të të Javës së Bibliotekës, e cila këtë vit zhvillohet me pjesëmarrje ndërkombëtare dhe program të pasur kulturor e shkencor.

Programi është i konceptuar me shumë aktivitete dhe shumë i pasuruar me sesione të ndryshme shkencore për temat që flasin për bibliotekat sot, tha Drejtoresha e Përgjithshme e Bibliotekës Kombëtare, Blerina Rogova Gaxha.

“Fatmirësisht ‘Java e Bibliotekës’ është e konceptuar si javë me shumë aktivitete të ndryshme që flasin për librin dhe bibliotekën. Sot është ceremonia e hapjes së Javës së Bibliotekës; e kemi zhvendosur në orët e pasdites në mënyrë që ta bëjmë më ceremoniale dhe për arsye se kemi mysafirë të shumtë ndërkombëtarë që do të marrin pjesë.

Ditët në vazhdim programi është i konceptuar me shumë aktivitete dhe shumë i pasuruar me sesione të ndryshme shkencore për temat që flasin për bibliotekat sot, për traditën dhe inovacionin në bibliotekari,” tha Blerina Rogova Gaxha duke përfunduar:

“Gjithashtu, përpos kësaj kemi edhe aktivitete të ndryshme kulturore, përfshirë edhe panelet e diskutimit, përfshirë letërsinë shqipe në Kosovë, panele të diskutimit për të drejtën e autorit dhe bibliotekat, dhe shumë të tjera.”

Ndryshe, aktivitetet e edicionit të 22-të të Javës së Bibliotekës do të zgjasin deri më 12 tetor 2025.