Bie tavani në konvikt, PD: Edi Rama dhe Erion Veliaj rrezikojnë jetën e studentëve!
Pas ngjarjes së rëndë në Qytetin Studenti, ku vetëm 4 muaj pas rikonstruksionit në një prej konvikteve ra tavani dhe u çanë muret, reagon Partia Demokratike përmes Ish-Deputetes Orjola Pampuri duke akuzuar Edi Ramën dhe Erion Velinë, të cilët ndonëse kanë hedhur 200 milionë lekë në bojën e propagandës së tyre, rrezikojnë jetën e studentëve.
“Rrëzimi i tavaneve në një prej konvikteve që gjoja u rikonstruktuan pas protestës së studentëve, është treguesi më i qartë i propagandës së rrezikshme të Ramës dhe veliajt. Në vend që të siguronin punime cilësore, siç studentët e meritojnë, kampionët e vjedhjes në Shqipëri bënë show me fasadat e godinave ku jetojnë shumica e studentëve,” thekson Orjola Pampuri duke risjell në vëmendje mashtrimin e madh të Edi Ramës dhe Erion Veliajt për përmirësimin e kushteve të jetësës në konvikte.
Erion Veliaj: “Dua të falenderoj stafin e qytetit Studenti, që kanë kaluar gjithë verën për t’u siguruar që kushtet janë optimale. Ajo që është bërë, është sagllam. Do të thotë me termoizolim, me nyje higjenosanitare, me bateritë e dusheve, me taraca të rregullta, me hapësira të përbashkëta, me ndriçim led, me rrjet të ri elektrik.”
Tani, fasada e Edi Ramës dhe e Erion Veliajt, thekson Partia Demokratike, ka rënë dhe vjedhjes me paratë e studentëve i ka dalë boja vetëm 4 muaj pas rikonstruksionit, të inauguruar me zhurmë të përditshme propagandistik nga kampionët e korrupsionit me fasadat.
Dokumentat zyrtare tregojnë se për suvatimin që ka rënë në godinat e studentëve, bashkia e Tiranës ka paguar 200 milionë lekë.
“Në këtë tender për vetëm 4 godina, si në shumë tendera të Bashkisë së Tiranës, nuk ka fituar oferta më e ulët. Kjo do të thotë se, megjithëse punimet janë kryer me më shumë para, ato janë kryer keq dhe kanë vënë në rrezik studentët,” thekson Ish-Deputetja e Partisë Demokratike dhe me 200 milionë lekë, të hedhur në bojën e propagandës së Edi Ramës dhe Erion Veliajt, jeta e studentëve nuk është bërë më e mirë që nga protesta e 10 muajve më parë.
“Përkundrazi! Për hir të pushtetit, është rrezikuar jeta e fëmijëve tanë . Erjon Veliaj dhe Edi Rama duhet të mbajnë përgjegjësi për këtë!”
Studentët nuk e meritojnë të jenë të rrezikuar në strehën që u siguron shteti, thekson Ish-Deputetja e Partisë Demokratike, Orjola Pampuri, ata nuk meritojnë të jenë të mashtrohen, të tradhëtohen dhe të braktisen sipas modelit të mjerë dhe korruptiv të Edi Ramës dhe Erion Veliajt, ndërsa përfundon:
“Alternativa më e mirë për studentët dhe për rininë është Partia Demokratike dhe plani i saj për një arsim të lartë cilësor, me kushte të garantuara, ku, të mbështetur me bursë, të rinjve u jepet mundësia të studiojnë, pavarësisht nga gjendja ekonomike.”
