Bien rastet, D’Angelo: Shpresojmë se Italia po hyn në një fazë stabilizmi

Me përditësimin e të dhënave në Itali për situatën e krijuar nga koronavirusi konstatohet për ditën e katërt me radhë se numri i njerëzve që rezultuan pozitiv po bie, dhe vetëm gjatë 24 orëve të fundit janë 3.491 raste ose 121 më pak.

Numri i vdekjeve gjithashtu ka pësuar rënie ndonëse është akoma shumë i lartë: 683 brenda 24 orëve deri të martën ishte 743. Numri i të shëruarve ka pësuar sërish rritje, 1.036 persona nga 903 sa ishte dje, dhe 495 ditën e hënë, me gjithsej 9.362 persona të shëruar, raportoi Drejtori Operativ i Departamentit të Mbrojtjes Civile italiane, Luigi D’Angelo, meqë kreu i Mbrojtjes Civile, Angelo Borrelli, mëngjesin e sotëm kishte pasur simptoma të COVID-19 me temperaturë të lartë. Komisari ka bërë një tampon për koronavirusin, ky është tamponi i dytë që i bëhet atij pasi i rezultoi një herë negativ disa ditë më parë. Tani priten rezultatet e testimit të fundit.

Luigi D’Angelo tha se shpresojmë se Italia po hyn në një fazë stabilizmi por duhet të jemi shumë të kujdesshëm.

“Mendojmë që është shumë e nevojshme, të ruajmë distancën sociale dhe rregullat e qëndrimit në shtëpi, nëse nuk duam që infektimet të rriten. Është një moment delikat. Nëse ulim vigjilencën ndaj kësaj përgjigjeje që ka qenë një përgjigje e fortë, ajo kurbë mund të ngrihet sërish,” tha Drejtori Operativ i Departamentit të Mbrojtjes Civile italiane, Luigi D’Angelo.

Ndryshe, që nga fillimi i epidemisë, në Italia janë infektuar 74.386 persona.