BIK shkarkon imamin që mbrojti Teorinë e Evolucionit

Bashkësia Islame e Kosovës, BIK, e ka përjashtuar nga puna si imam i xhamisë në Vitomericë të Pejës, Imami, Drilon Gashi, me arsyetimin se ka shkelur parimet e Kuranit, raporton RFE.

Sipas Imamit, shkak për këtë shkarkim, është bërë një deklaratë e bërë në muajin qershor të vitit 2018, në televizionin Rrokum ku ai shprehet se “teoria e evolucionit është teoria e vetme bashkëkohore që ka arritur t’iu bëjë ballë furtunave të kohës. Do të thotë argumentet po shkojnë deri tek ajo që evolucioni është fakt.”

Drilon Gashi përmes një postimi në rrjetin social Facebook tha se ai është shkarkuar para një muaji, mirëpo vendimin e ka marrë sot.

“Arsyetimi i tyre çuditërisht thotë se përmes deklaratave të mia, paskam shkelur Kuranin dhe traditën profetike! Ndërsa unë deklaroj që çdo herë jam munduar ta pasoj vetëm argumentin, të vërtetën dhe t’i qëndroj besnik rrugës së drejtë dhe Kuranit,” thekson Gashi.

Sipas tij, në BIK mungon të menduarit racional dhe “nuk u lejohet të mendoni në mënyrë kritike e as të dialogoni”.

“Nuk jam i zhgënjyer pse ma mbyllën derën e Xhamisë, më hodhën në rrugë dhe mbeta i papunë, por më dhemb zemra për këtë sistem të instaluar brenda institucionit më të madh fetar në vend, i cili në këtë mënyrë, katërcipërisht po bie nën ndikimin e ideologjive dhe doktrinave fetare politike të jashtme”, thotë Gashi.

Në mars të këtij viti ai ishte suspenduar nga detyra për një vit.