“Bilbilfryrësit”, Parlamenti i kërkon ILDKPKI-së monitorim të njësive në institucione

Parlamenti i ka kërkuar Inspektoratit të Lartë të Deklarimit të Kontrollit të Pasurive dhe Konfliktit të Interesit, ILDKPKI, që të ketë vëmendje për zbatimin korrekt të ligjit për sinjalizimin dhe mbrojtjen e sinjalizuesve dhe forcim të rolit të njësive të ngritura.

Në një pikë të veçantë të projektrezolutës për aktivitetin e këtij institucioni kërkohet që ILDKPKI “të krijojë instrumente të qëndrueshëm në veprimtarinë e saj që mundësojnë fuqizimin e rolit proaktiv në drejtim të monitorimit sistematik të njësive përgjegjëse për zbatimin efektiv të ligjit nr. 60/2016 “Për sinjalizimin dhe mbrojtjen e sinjalizuesve”.

Kjo kërkesë është mes një sërë të tjerash ku Parlamenti kërkon nga Inspektorati që të vihet fokus në verifikimin e kandidatëve në organet e ndryshme të sistemit të drejtësisë.

Po kështu të marrë të gjitha masat institucionale, në drejtim të funksionimit të plotë të sistemit elektronik të deklarimit të interesave privatë, me fokus rritjen e kapaciteteve të autoriteteve përgjegjëse për plotësimin e deklarimeve nga subjektet e ligjit në mënyrë të saktë.

Sinjalizuesit gjendja në vitin 2021

Në raportin vjetor të vitit të shkuar ILDKPKI raportoi se ishin 362 njësi përgjegjëse në sektorin publik, si dhe 527 njësi përgjegjëse sinjalizuesish në sektorin privat të cilat duhet të raportonin.

Nga këto raporte Inspektorati ka nxjerrë edhe konstatimet për institucionet ku ka më shumë sinjalizime që mund të lidhen me shkelje të ndryshme brenda institucionit.

“Në këtë kuadër, Inspektorati i Lartë ka marrë dhe administruar 199 raporte vjetore nga Njësitë Përgjegjëse pranë autoriteteve publike, ku nga analizimi i tyre konstatohet se në 3 Njësi Përgjegjëse janë sinjalizuar dhe trajtuar raste, në kuadër të Ligjit nr. 60/2016, i ndryshuar, si më poshtë:

Banka e Shqipërisë: për vitin 2021 është raportuar pranë adresës së dedikuar, rast apo veprim i dyshuar, për të cilin është vendosur mos fillimi i procedurës së hetimit administrativ, si rrjedhojë e tërheqjes së sinjalizimit.

Bashkia Tiranë. Raportohen të jenë regjistruar 6 raste sinjalizimi, për të cilat janë kryer veprimet procedurale, në zbatim të Ligjit nr. 60/2016 “Për sinjalizimin dhe mbrojtjen e sinjalizuesve”, i ndryshuar.

Drejtoria e Përgjithshme e Burgjeve. Raportohen 2 raste sinjalizimi, për të cilat janë marrë masat për nxjerrjen përpara përgjegjësive të personave të gjetur në shkelje të përmbushjes së detyrave funksionale” thuhet në raport.

Ligji i vitit 2016 për sinjalizuesit ngarkon institucionet me detyrën e ngritjes së njësive përgjegjëse të sinjalizimit pranë institucioneve publike, në nivel qendror dhe vendor, që kanë të punësuar mbi 80 punonjës dhe pranë kompanive private që kanë mbi 100 të punësuar./Monitor/