Bill Clinton dhe Princi Charles nderojnë viktimat e Masakrës së Srebrenicës

Në ceremoninë e 25 vjetorit të Masakrës së Srebrenicës e cila u mbajt sot në fshatin Potocari në Bosnje Hercegovinë, afër vendit të asaj që konsiderohet mizoria më e keqe në tokën europiane që nga Lufta e Dytë Botërore, mori pjesë edhe Ish-Presidenti amerikan Bill Clinton, Princi Charles i Mbretërisë së Bashkuar dhe liderë të tjerë europianë.

Organizatorët kishin planifikuar të zhvillonjë një organizim madhështor për të nderuar kujtimet e mbi 8.000 burrave dhe djemve të vrarë në masakër, por u anulua për shkak të koronavirusit; Dhe vetëm rreth 50 njerëz, shumica udhëheqës lokalë dhe familjarë të viktimave, morën pjesë duke respektuar distancën sociale.

Ndërkohë sot në 25-vjetorin e gjenocidit, mbetjet mortore të nëntë viktimave nga gjenocidi i Srebrenicës u varrosën në Qendrën Përkujtimore Potoçari.

Viktimat, të gjithë myslimanë boshnjakë, të vrarë nga forcat serbe, u varrosën pranë 6.610 viktimave të identifikuara, ndërkaq 1.000 persona ende evidentohen si të zhdukur.

Ndryshe, në këtë korrik bëhen 25 vjet qëkur forcat serbe të Bosnjes, të udhëhequra nga Ratko Mlladiç, kanë vrarë mbi 8.000 burra dhe djem myslimanë në një zonë të mbrojtur nga paqeruajtësit e Kombeve të Bashkuara, në dhe përreth Srebrenicës.

Gjykata Ndërkombëtare e Drejtësisë në Hagë ka konstatuar në vitin 2007 se vrasjet në Srebrenicë ishin gjenocid.

Gjykata e Kombeve të Bashkuara për Krimet e Luftës në Ish-Jugosllavi ka dënuar Mlladiqin dhe mentorin e tij politik, Radovan Karaxhiq, për gjenocid dhe krime të tjera të luftës në Srebrenicë.