Dyshimi për Asociacionin, Biserko: Rasti i Banjskës e ka hequr ndarjen e Kosovës nga tryeza bisedimeve

Kryetarja e Komitetit të Helsinkit për të Drejtat e Njeriut në Serbi, Sonja Biserko, konstaton se dialogu Kosov-Serbi po shkon në një rrugë të re pas rastit të Banjskës, që përfundimisht e ka hequr ndarjen e Kosovës nga tryeza e bisedimeve

Duke folur për dialogun dhe rrugën e pajtimit mes Kosovës e Serbisë, Sonja Biserko tha për RTK se sot serbët në veri dhe në jug nuk janë në pozita të njëjta, dhe institucionet e Kosovës duhet të kenë kujdes në qasjen ndaj minoritetit serb sepse dikur ishin në pozitë dominuese e tani nuk janë, dhe një kohë të gjatë ata kanë jetuar në një lloj vakumi..

“Në veri serbët kontrollohen nga Beogradi dhe janë penguar të integrohen në institucionet e Kosovës, duke pasur të gjitha garancitë për të drejtat e tyre nga Kushtetuta e vendit,” tha Biserko ndërsa për ndarjen e Kosovës e cila është pritur për një kohë të gjatë të ndodhë, dhe, sipas saj, e ka ndaluar Kancelarja Merkel, ka një këndvështrim ndryshe ashtu si dhe për dialogun.

“Tashmë dialogu po kthehet ne një rrugë të re, sidomos pas rastit të Banjskës që përfundimisht e ka hequr ndarjen e Kosovës nga tryeza e bisedimeve,” tha Sonja Biserko e cila vlerëson se Beogradi ka hequr dorë nga Kosova me vet faktin që është penguar pjesëmarrja në zgjedhje nga serbët e Kosovës. 

“Duke i nxjerrë nga institucionet e këtij vendi, duke ngelur në një komunitet të cenueshëm dhe për këtë institucionet e Kosovës duhet të kenë kujdes në qasjen ndaj tyre, sepse do të shkaktohej një traumë e madhe,” tha Kryetarja e Komitetit të Helsinkit për të Drejtat e Njeriut ndërsa bëri të ditur se në Serbi po flitet se po ndërtohen banesa në Sanxhak për serbët e Kosovës dhe që Universiteti shtetëror i Mitrovicës po transferohet në Novi Pazar, ashtu si dhe dislokimi i qendrës shëndetësore.

Ajo sheh shanse për pajtim mes të dy popujve ndërsa flet për fakte ndërsa duhet vendosur parametrat ku do të vendoseshin kornizat, përmes të cilave do të udhëhiqej ky proces, pa harruar plagët e mëdha të popullit të Kosovës nga shteti serb gjatë shekujve, derisa serbët nuk kanë kërkuar falje për të gjitha ato të bëma.

Për minoritetin serb që dëshiron të jetojë në Kosovë, Biserko është e bindur se mund të jetojnë sepse këtu ka ligje që krijojnë mundësi për integrim. Megjithatë, ajo thotë se nuk mjafton vetëm vullneti politik, por e gjithë shoqëria quhet të jetë më e qasshme në këtë.

Kryetarja e Komitetit të Helsinkit për të Drejtat e Njeriut në Serbi, Sonja Biserko, kritikon qasjen e Bashkimit Evropian në raport me dialogun mes Kosovës e Serbisë ndërsa konstaton se Miroslav Lajçak nuk ishte i suksesshëm pa ndihmën e përfaqësuesit amerikan, duke përmendur marrëveshjet e arritura ne Bruksel dhe në Ohër që nuk janë zbatuar.

Në fund, lidhur me Asociacionin e Komunave me Shumicë Serbe, Sonja Biserko tha se bashkësia ndërkombëtare që nga fillimi i luftërave ka zbatuar këtë idenë etnike, duke vënë në pah edhe Marrëveshjen e Daytonit ndërsa nuk fsheh dyshimet që ka:

“Ajo që mua më bën të dyshoj në këtë zgjidhje, është se që nga fillimi, Beogradi e ka kërkuar Asociacionin si ndarje etnike, si një lloj statusi i një ‘Republika Srpska’ dhe fatkeqësisht nuk ka garanci që kjo nuk do të ndodhë, dhe bashkësia ndërkombëtare nuk ka bërë asgjë, as në Bosnje.”