Biznesi kërkon zgjatjen orarit, Edi Rama kërcënon: Lungomare s’ka muzikë…
Bizneset në Vlorë kanë ulur qepenat për 24 orë në shenjë kundërshtimi për orën policore, ndërsa kanë sqaruar edhe incidentin që ndodhi dje pasi vendosën bashkërisht që të vendosnin himnin kombëtar pas orës 22:00, dhe i menjëhershëm ka qenë reagimi i Kryeministrit Edi Rama duke theksuar se Lungomare s’ka muzikë po ndotje akustike të tmerrshme dhe e drejta e atyre që duan zhurmë muzikore tërë natën nuk fiton dot mbi të drejtën e atyre që natën duan zhurmën e detit.
Gjithsesi, pas fjalëve të ashpëra ai thotë se duke filluar nga nesër 20 korrik, muzika do të ndalet në orën 23.00 në çdo zonë turistike të banuar ndërsa për ata që do kërcejnë e këndojë tërë natën jep një zgjidhje.
“Protestë në Lungomare për muzikën?
1. Lungomare s’ka muzikë po ndotje akustike të tmerrshme ku përzihen dhjetëra linja burime menjëherë
2. E drejta e atyre që duan zhurmë muzikore tërë natën nuk fiton dot mbi të drejtën e atyre që natën duan zhurmën e detit,” tha Edi Rama duke përfunduar:
“3. Siç është lajmëruar, nga data 20 korrik muzika do të ndalet në 23.00 në çdo zonë turistike të banuar dhe kush do të kërcejë e të këndojë tërë natën po të dojë, le të organizohet në natyrë, në pika ku nuk shqetëson njeri – si në tërë botën e civilizuar turistike.”
Ndryshe, gjatë protestës njëri prej përfaqësuesve të këtyre bizneseve tha se incidenti mbrëmë në zonën e Ujit të Ftohtë ndodhi pasi muzika (himni) u luajt edhe 5 minuta pas hyrjes në fuqi të orës policore por shtoi se mbrëmë dhe jo vetëm, policia po ushtron terror në bizneset e tyre duke vendosur dhe gjoba.
“Mbrëmë ishim në polici, pasi vendosëm në mënyrën më simbolike dhe në mënyrën më të mirë të mundshme që të vendosnin himnin kombëtar në orën 21:45 minuta deri në 22:00. Ndodhi një incident me një kolegun tonë, pasi ka qenë ora 22:05, vetëm për 5 minuta. U bë e gjithë ajo skenë e pahijshme. Kemi qëndruar deri në orën 03:00 të natës para policisë, deri sa i nxorën kolegët tanë. Ju keni qenë prezent. Ndërsa siç e kemi paralajmëruar, sot është mbyllje totale 24 orë. Jemi takuar për të vendosur për vazhdimësinë e kësaj proteste. Sot është mbyllje totale 24 orë, përveç disa administratorëve nga Tirana. Ndodh shesh që etiketoni Vlorën, jugun që ka çmime të shtrenjta. Ju garantojmë që në të gjitha këto raste pronarët janë nga Tirana. Nuk ka lezet që turistët e huaj apo edhe nga Tirana, që të shajnë Jugun dhe Vlorën për çmime të shtrenjta. Ata pronaret e barëve, restoranteve, longe-ve, që i kanë këto çmime janë nga Tirana. Ku ka biznese vlonjate do të ngeleni të kënaqur,” tha njëri nga pronarët duke sqaruar për atë që mund të ndodhë në ditët në vijim:
“Sot jemi të bashkuar të gjithë bashkë dhe jemi të indinjuar nga sjellja e policisë. Vjen polici dhe thotë; nxirr klientin. Si ta nxjerr jashtë klientin, për ne është herezi. Ndërkohë që në Lungomare ka njerëz që shëtisin pa fund. Nuk e kuptoj dot që muzika është covid, nuk e kuptoj dot këtë orar. Nuk është një llaf goje që mbyllen bizneset në Vlorë, jemi për të bërë biznes, dhe jo ceremoni mortore me orare siç i vendosin këta. Jemi të përgjegjshëm që të gjithë për situatën me COVID, bashkë me punonjësit tanë. Të gjithë kanë punuar me shpirt dhe kemi bërë maksimumin.”
Protesta të biznesit përgjatë vijës bregdetare ka pasur edhe në qytetet tjera!
