BKH kontroll në “Delta Pharma”, si i shiti aksionet gruaja e Ilir Beqajt
Me kontrollin që Byroja Kombëtare e Hetimit, BKH, dhe policia, me urdhër të SPAK, kryen në farmacinë “Delta Pharma”, por dhe në disa farmaci të tjera kryesisht të lokalizuara në Tiranë, dalin dhe detajet lidhur me hetimin e Prokurorisë së Posaçme për rolin e Ish-Ministrit të Shëndetësisë, Ilir Beqaj, në kontrollin e kompanive farmaceutike.
Pas “Delta Pharma”, BKH ka ushtruar kontrolle në banesat e aksionarëve dhe drejtuesve të kompanisë farmaceutike ndërkohë rezulton se gruaja e Ilir Beqajt, Adriana Beqaj, ka qenë aksionere në një kompani që lidhet me “Delta Pharma:.
Teksa SPAK ka nisur hetimet për një çështje të re penale, ku po hetohet roli i Ish-Ministrit të Shëndetësisë, Ilir Beqaj, për të parë lidhjet që mund të ketë me kompaninë farmaceutike “Delta Pharma” dhe disa farmaci të tjera, , BW raporton, se në skenë del dhe bashkëshortja e tij, Adriana Beqaj.
Ardiana Beqaj rezulton se ka pasur 15% të aksioneve të “Albanian Food and Hospitality”, dhe më datë 3 mars të 2020-ës është larguar si aksionere nga ky biznes, ku rezultonte aksioner dhe Eduard Curraj. Kjo lëvizje rezulton të jetë kryer pikërisht në kohën kur SPAK nisi hetimet për koncesionin e sterizilimit.
Ky i fundit po ashtu ka qenë aksioner 100% i “Delta Pharma” dhe në 24 shkurt 2023 Eduard Curraj ka shitur kuotat, të cilat përfaqësojnë 100% të kapitalit të regjistruar të “Delta Pharma” shoqërisë “Delta Holding” sh.k.p në administrim të shtetases polake Ewa Maria Kokot.
Ndonëse pronësia mbi kuotën do t’i kalojë e gjitha shoqërisë “Delta Holding”, palët kanë rënë dakord që pas kalimit, Eduard Curraj do të vazhdojë të jetë administrator i “Delta Pharma”.
Ndryshe, hetimet për këto kompani kanë nisur pas indicieve që SPAK ka marrë lidhur me shkeljet e pretenduara, kur ky institucion drejtohej nga Beqaj. Theksohet se ky është një hetim i ri, i cili nuk lidhet me hetimet e mëparshme për Ilir Beqajn.
Nga kontrollet e ushtruara në “Delta Pharma” dhe farmaci të tjera, janë sekuestruar dokumente që i shërbejnë hetimit, e po ashtu kompjuterë, bilancet, furnizime dhe telefona.
