“Black out” në Tiranë, OSHEE: Flakë në kanalin e kabllove 20kV, po punohet për rikthimin e energjisë elektrike

Për shkak të flakës në kanalin e kabllove 20kV të një prej fiderave të NST Traktora, sot rreth orës 13.27, janë stakuar për masë sigurie çelësat 20kV të transformatorit duke lënë pa tension nënstacionin, sqaron OSHEE pas “black outit” që ndodhi në Tiranë ku një pjesë e konsiderueshme e kryeqytetit mbeti pa energji elektrike.

“Menjëherë u morën masat nga ana e OSSH për shuarjen e flakëve, ndërsa objektet e rëndësisë së veçantë si spitalet, furnizimi me energji elektrike u krye përmes linjave unazore,” bënë të ditur OSHEE përmes një njoftimi duke informuar se po punohet për rikthimin e energjisë elektrike ndërsa përfundon:

“Grupet e avarisë së Tensionit të Lartë dhe të Drejtorisë Rajonale Tiranë janë në terren dhe po punojnë për eleminimin e defektit dhe rikthimin e energjisë elektrike tek të gjitha zonat e mbetura pa tension si pasojë e avarisë.”

Ndryshe, për shkak të një defektit në Nënstacionin Traktora, pa energji elektrike mbetën: Rruga e Elbasanit, Uzina e Autotraktorëve, Brryli, Shkolla e Bashkuar, Ali Dem dhe zona e Freskut.