Blerja e armëve nga Kina, Vuçiç i përgjigjet Ambasadës amerikane

Presidenti i Serbisë, Aleksandar Vuçiç, tha sot se e ka kuptuar kritikën e Ambasadës amerikane në Beograd për blerjen e armëve kineze dhe të njëjtën e interpreton si një komunikatë politike.

“Sa herë që vendosim të blejmë diçka nga armët, dikush gjithmonë ka diçka kundër nesh, dhe kjo është logjike,” tha Vuçiç gjatë një vizite në sheshin Sava në Beograd.

Ky është komenti i parë i Vuçiçit lidhur me deklaratën e Ambasadës amerikane në Beograd dhënë për RFE ku thuhet se qeveritë duhet të kuptojnë rreziqet dhe kostot afatshkurtra dhe afatgjata nga të bërit biznes me kompanitë kinez.

Presidenti Vuçiç sqaroi se Serbia ende nuk e ka blerë sistemin raketor kinez për mbrojtje të tipi FK-3, por që ka menduar për të.

“Ne gjithmonë do të marrim vendime vetë. Përndryshe, FK-3 nuk është në listën e sanksioneve amerikane.”

Ambasada e Shteteve të Bashkuara në Serbi tha më 10 gusht se blerja e pajisjeve ushtarake dhe mbrojtëse është një vendim sovran.

Blerja e sistemeve raketore për mbrojtje, FK-3, është përfshirë në raportin vjetor të kompanisë shtetërore për armët, Jugoimport SDPR, që i është dërguar Agjencisë për Regjistra të Biznesit.

Vuçiç gjithashtu nënvizoi se Serbia është një vend i lirë, sovran, duke shtuar se nuk do të rrezikonte interesat e vendit.

Vuçiç: Jam i lumtur për shkak të vaksinës ruse

Presidenti i Serbisë, Aleksandar Vuçiç gjithashtu tha se është gëzuar që Rusia ka prodhuar vaksinën kundër COVID-19.

“Unë jam i lumtur nëse rusët e prodhuan, por ekspertët tanë duhet ta kontrollojnë atë,” tha Vuçiç duke theksuar se vaksina është një shpëtim për ekonominë tonë ndërsa shtoi se do të jeti i pari që do ta marrë vaksinën, për të cilën ekspertët në Serbi thonë se është e mirë dhe ndihmon në parandalimin e COVID-19.

Ndryshe, raporton RFE, sot Presidenti i Rusisë, Vladimir Putin, para qeverisë tha se një vaksinë për luftimin e koronavirusit e zhvilluar në Rusi është e gatshme për përdorim dhe se njëra nga vajzat e tij është vaksinuar.