Blerja e armëve nga SHBA, Presidentja Osmani: Kosova po hyn në një fazë të re…
Republika e Kosovës po hyn në një fazë të re dhe vendimtare të fuqizimit të kapaciteteve shtetërore të mbrojtjes, tha Presidentja Vjosa Osmani, ku përfshihet dhe zhvillimi i Forcës së Sigurisë së Kosovës konform standardeve të NATO-s dhe thellimin e marrëdhënieve me partnerin tonë strategjik, Shtetet e Bashkuara.
“Si Presidente e Republikës dhe Komandante Supreme e FSK-së shprehë mirënjohjen time për institucionet tona të mbrojtjes të cilat për vite me radhë punuan për përmbushjen e kritereve për kualifikim në Programin e Shitjeve Ushtarake të Departamentit të Shtetit të SHBA-ve,” tha Presidentja e Kosovës në reagimin e saj përmes rrjetit social Facebook duke shpreh falënderim të veçantë për Sekretarin Blinken me të cilin ka diskutuar mbi miratimin e programit të Shitjeve Ushtarake të Huaja, FMS, në korrik të vitit 2022, për Departamentin e Mbrojtjes së SHBA-ve dhe Kongresin e Shteteve të Bashkuara, i cili tashmë është njoftuar zyrtarisht për synimin e Kosovës për të blerë sisteme mbrojtëse armësh përmes programit FMS.
“Siç u tha në Deklaratën thelbësore të Qeverisë amerikane: “Kjo shitje e propozuar do t’i mbështesë qëllimet e politikës së jashtme dhe sigurinë kombëtare të Shteteve të Bashkuara duke përmirësuar sigurinë e një partneri evropian që është një forcë e rëndësishme për stabilitetin politik dhe ekonomik në Evropë. Shitja e propozuar gjithashtu do ta rrisë kapacitetin afatgjatë mbrojtës të Kosovës për ta mbrojtur sovranitetin dhe integritetin territorial, si dhe për t`i përmbushur kërkesat shtetërore në sferën e mbrojtjes,” thekson Presidentja e Kosovës, Vjosa Osmani, duke shpreh besimin e plotë se Kongresi do ta mbështesë këtë shitje të mundshme për vendin më proamerikan në botë, si një akt i cili do ta rrisë sigurinë në Kosovë, në rajonin tonë, si dhe në kontinentin evropian.
Ndryshe, dje Departamenti amerikan i Shtetit ka bërë të ditur se Kosova ka bërë kërkesë që të blejë raketa Javelin në vlerë prej 75 milionë dollarë. Sipas Agjencisë amerikane për bashkëpunim në siguri, fjala është për 246 raketa antitank të tipit Javelin, prodhim i SHBA.
