Bllokimi i 300 kosovarëve, Von Cramon: Serbia duhet të ndalojë turpërimin e vetes!
Pas bllokimit të qytetarëve të Kosovës nga autoritetet e Serbisë në kufirin Kroaci – Serbi, ka reaguar raportuesja për Kosovën në Parlamentin Evropian, Viola Von Cramon, duke kërkuar nga shteti serb që menjëherë që t’i lërë qytetarët e Kosovës të kalojnë kufirin në Batrovc.
“Serbia duhet të ndalojë turpërimin e vetes dhe menjëherë t’i lërë qytetarët e Kosovës që të kalojnë kufirin në Batrovc,” shprehet raportuesja për Kosovën në Parlamentin Evropian, Viola Von Cramon, në reagimin e saj përmes rrjetit social X duke kërkuar lirin e lëvizjes për të gjithë.
“Duhet të sigurohet liria e lëvizjes së të gjithëve, pa diskriminim në bazë të kombësisë.”
Ndërkohë Ministria e Punëve të Jashtme dhe Diasporës dhe Ministria e Punëve të Brendshme e Kosovës kanë bërë thirrje që pas situatës së krijuar në pikat kufitare në Serbi dhe ndaljes arbitrare të qytetarëve të Kosovës në vendkalime kufitare, të gjithë bashkatdhetarët dhe qytetarët që janë në lëvizje të evitojnë me çdo kusht kalimin nëpër Serbi.
“MPJD dhe MPB janë duke ndërmarrë veprimet e nevojshme dhe do t’iu mbajnë të informuar rreth detajeve të reja. Të gjithë udhëtarët luten që të ndjekin me vëmendje situatën e tensionuar të sigurisë dhe të mos udhëtojnë përmes Serbisë. Duke marrë parasysh faktin që në qarkullim janë shumë lajme të rreme, të cilat synojnë përhapjen e frikës dhe kaosit, ju lusim të ndiqni faqen zyrtare të Policisë së Kosovës reth përditësimeve më të fundit zyrtare në këtë drejtim,” thekson Ministria e Punëve të Jashtme dhe Diasporës e Kosovës përmes një njoftimi.
Ndryshe, rreth 300 qytetarë të Kosovës që nga mesnata janë duke u mbajtur të bllokuar nga autoritetet serbe në kufirin mes Kroacisë dhe Serbisë, ngjarje e cila ka ndodhur pas miratimit në Asamblenë Parlamentare të KiE të rekomandimit për anëtarësimin e Kosovës në Këshillin e Evropës.
