Bllokohen disa rrugë pas reshjeve të shiut dhe borës, Ministri i Infrastrukturës jep detaje

Ministri në detyrë i Infrastrukturës, Hysen Durmishi, ka bërë me dije se reshjet e fundit të shiut dhe borës kanë shkaktuar probleme në disa rrugë të Kosovës.

Në rrugën Prishtinë–Ferizaj, sipas ministrit në detyrë, ka grumbullim të ujit për shkak të kyçjeve ilegale në kanale, për çka qarkullimi është bllokuar. Ai ka njoftuar se ekipet janë në terren duke punuar në shkarkimin e ujit dhe rruga pritet të hapet për qarkullim brenda ditës.

Në nënkalimin e Mazgitit, drejt autostradës, gjithashtu ka grumbullim uji për shkak të bllokimit të kanalit, dhe po punohet intensivisht për zhbllokimin e rrugës.

Në Autostradën Ibrahim Rugova janë regjistruar rrëshqitje të dheut. Ministri ka theksuar se “po punohet për sanim sa më të shpejtë, në mënyrë që qarkullimi të zhvillohet normalisht”.

Në Sllatinë, rruga Fushë Kosovë–Gjurgjicë, ka grumbullim uji në rrugë, ku ekipet kanë ndërhyrë për “sanimin emergjent dhe shumë shpejt pritet rikthimi i qarkullimit normal”.

Po ashtu, në rrugën Zhur–Dragash ka lëvizje të trupit të rrugës, ku është vendosur sinjalizimi përkatës dhe aktualisht qarkullimi zhvillohet në një shirit, tha Ministri në detyrë i Infrastrukturës, Hysen Durmishi, duke përfunduar:

“Kërkojmë mirëkuptimin e qytetarëve deri në sanimin e plotë të këtyre problemeve dhe, nëse është e mundur, të evitohet qarkullimi i panevojshëm në këto pika.”