Blofin e luajnë Baton Stanishiçi dhe Preç Zogaj, Berisha: Bashkimi i garantuar rreth votës së lirë!
Lideri historik i Partisë Demokratike, Sali Berisha, tha se Komisioni i Rithemelimit është i hapur për të diskutuar dhe garantuar bashkimin rreth votës së lirë ndërsa kërkesën e disa anëtarëve të Grupit Parlamentar të PD që ai të tërhiqet e konsideron blof me të cilin po luajnë Baton Stanishiçi dhe Preç Zogaj.
“Dua të garantoj demokratët e të gjitha niveleve, se PD është e hapur dhe vullnetplotë për të diskutuar, për të debatuar me çdo anëtar të saj, cilido qoftë ai. Jemi të hapur të bëjmë gjithçka për garantimin e votës së lirë dhe bashkimin rreth votës së lirë. Pra, nëse nuk bëhet fjalë për një kryesi, mbasi ajo është e shkarkuar me vendimin e kongresit historik të 11 dhjetorit, kjo nuk do të thotë se fjala e demokratëve, cilido qoftë ai, nuk dëgjohet apo nuk përfillet.
Natyrisht fola për 11 dhjetorin, por sanksionimin e plotë 11 dhjetori e mori më 6 mars. Në këtë kontekst, ajo që dua të theksoj dhe siguroj është se PD ka institucionin e saj, tashmë operativ dhe të plotë dhe ky është grupi parlamentar. PD ka institucionin e plotë të dalë nga kuvendi i 11 dhjetorit, që është Komisioni i Rithemelimit,” tha Sali Berisha i prerë:
“Gjykoj se brenda Grupit Parlamentar të PD mund të zhvillohet çdo debat. Sikundër dua të theksoj, dhe ftoj miqtë e mi, të mos harrojnë bashizmi ishte doktrinë e dhunimit të statutit, të institucioneve, parimeve të partisë. Ai u arkivua së bashku me dorëheqjen e Lulzim Bashës.”
Ndërkohë kërkesën e disa anëtarëve të Grupit Parlamentar të PD që ai të tërhiqet, pas vendimit të Lulzim Bashës për t’u dorëhequr nga drejtimi i partisë, Berisha e konsideron blof.
“Me blofin nuk mund të luhet. Me blofin luan vetëm një dyshe, Baton Stanishiçi dhe Preç Zogaj. I mbushin xhepat me gurë në zyrat e Edi Ramës dhe të Fugës.Procesi mbetet i pacenuar, por duhet që kushdo që ka idera dhe qëndrime, t’i shtrojë në grupin parlamentar. Askush nuk ka autoritet që të ndryshojë 11 dhjetorin, që u sanksionua më 6 mars,” tha lideri historik i PD, Sali Berisha, duke dhënë mesazh të qartë se askush nuk mund të mendojë se ekzistojnë dy parti ndërsa përfundon:
“Ekziston një dhe një vetëm PD. Unë po takoj dhe një proces i mrekullueshëm po ndodh në bazë. Po takoj kryetarë që deri dje, kanë qenë në takimin me Lulzim Bashën, por që janë të qartë se 6 marsi ka vetëm një mesazh: Bashkimin. Dhe se ia kanë thënë Lulzim Bashës në sy. Nuk duhet të bëjmë asnjë lloj spekulimi me fjalë apo me qëndrime. Grupi Parlamentar është përfshi edhe Lulzim Bashën. Urdhëroni të bëjmë diskutimet”.
