Bloomberg: Trump planifikon të dërgojë emigrantë në Serbi

Qeveria e presidentit amerikan, Donald Trump, po kërkon nga Serbia dhe vendet e tjera të Ballkanit që të pranojnë emigrantët e deportuar nga SHBA.

Kërkesa drejtuar vendeve të Ballkanit, raporton e përditshmja amerikane Bloomberg, është pjesë e një strategjie më të gjerë amerikane për të gjetur qeveritë e huaja të gatshme për të pritur emigrantët e deportuar, por nuk specifikon se për cilat vende të tjera të Ballkanit bëhet fjalë.

Shtëpia e Bardhë, Departamenti i Shtetit dhe Ministria e Punëve të Jashtme të Serbisë nuk kanë komentuar ende artikullin e Bloomberg.

Gjykata e Lartë e SHBA muajin e kaluar lejoi administratën Trump të revokojë statusin e përkohshëm ligjor të qindra mijëra emigrantëve nga Venezuela, Kuba, Haiti dhe Nikaragua që jetojnë në SHBA.

Autoritetet tani po kërkojnë destinacione të mundshme për ata emigrantë që mund të deportohen, raporton Bloomberg duke theksuar gjithashtu se Serbia është e rëndësishme për familjen Trump për shkak të kullave në Beograd që do të ndërtohen nga një kompani, themeluesi i së cilës është, dhëndri i presidentit amerikan, Jared Kushner.