Bojkoti në FSHS, Albin Kurti: Pas këtij dimri të gjatë, shqiptarëve iu duhet një Pranverë Shqiptare!
Kryetari i Lëvizjes Vetëvendosje pasi ka takuar pedagogët dhe studentët pranë Fakultetit të Shkencave Sociale në Tiranë ka ligjëruar ashtu siç ishte parashikuar para studentëve që vazhdojnë bojkotin mbi “Protestat studentore, aktualiteti dhe arsimi publik”.
“Protesta e studentëve është e drejtë kur pedagogët janë me ta. Arsimimi duhet të jetë falas, për luksin paguhet, kurse arsimi nuk është luks. Protesta e studentëve është protestë kundër privilegjeve që ekzistojnë për biznesmenët. Studentët kanë reaguar ndaj padrejtësive në arsim. Politika te ne është arti i keq, në Shqipëri është monopolizuar gjithçka, dhe humori,” tha Albin Kurti duke e vlerësuar protestën e studentëve si një moment të bukur dhe organizim autentik të këtyre viteve:
“Protesta e studentëve në Shqipëri, e posaçërisht në Tiranë, ka qenë momenti më i bukur dhe organizimi më autentik i tërë këtyre viteve. Dritat që ndezin studentët dhe populli i varfëruar i tregojnë lakuriq princat tanë në skenën politike. Shqiptarëve, këndej e andej kufirit, pas këtij dimri të gjatë iu duhet një Pranverë Shqiptare.”
Lidhur me pretendimin e Dekanit të Fakultetit se Albin Kurti ishte në godinë pa leje, Kryetari i Lëvizjes Vetëvendosje u shprehë:.
“Ua thonë vetë studentët, është pyetje për ta!”
Ndërsa për kureshtarët që pyetën nëse prezenca e tij në një bojkot studentor mund të konsiderohet si ndërhyrje e politikës, Kurti ishte i prerë:
“Unë tërë jetën ndërhyj dhe prandaj jam në politikë. Politika është ndërhyrje subjektive në bazë të asaj që beson të jetë e drejtë dhe e mendon të jetë e vërtetë. Protesta studentore në Tiranë janë ngjarja më e bukur shoqërore. Këta duhen admiruar. Vështirësitë nëpër të cilat po kalojnë do ti kalisin ata në kapërcimin e pengesave në të ardhmen. Një lloj degradimi i skenës politike në Shqipëri dhe Kosovë është rezultat i rezistencës popullore, posaçërisht asaj studentore që po dëshmon që kthim pas nuk ka. Nuk mund të kthehemi në vjeshtën e 2018. Kanë rënë skemat politike, jemi kthyer në skenën politike, ku nën dritat e reflektorëve qytetarë po shihet se mbretërit apo princat janë lakuriq.” Bojkoti i studentëve në disa Fakultete të Tiranës ka vazhduar duke përfshirë edhe Shkodrën, ndërsa sot zyrtarisht nisën grevën pedagogët e Fakultetit të Shkencave Sociale.
