Bojkotoni! Rezistoni!/ Thirrje, Basha: Mos shkoni të votoni!
Kur na ndajnë edhe pak orë nga zgjedhjet vendore të organizuara nga Kryeministri Edi Rama dhe në kundërshtim me Dekretin e Presidentit të Republikës të publikuar në Fletoren Zyrtare, për zgjedhjen e kryetarëve komunistë të bashkive, Kryetari i Partisë Demokratike, Lulzim Basha, i bëri thirrje shqiptarëve që ti bojkotojnë këto zgjedhje, me qëndresë dinjitoze, me vendosmëri dhe jo dhunë!
Lulzim Basha u bëri thirrje shqiptarëve të mos shkojnë të votojnë, të bojkotojnë dhe nëse janë të detyruar të shkojnë në qendrat e votimit nga hakmarrja e regjimit të rezistojnë, sepse sicc tha ai, regjimit po i vjen fundi! Nuk kanë çfarë t’ju bëjnë!
“Dhuna nuk është zgjidhja. Jini krenarë! Regjimi i Ramës është drejt fundit! Nesër në Shqipëri nuk ka zgjedhje. Zgjedhjet janë mekanizmi se si njerëzit vendosin për qeverisjen që duan, por nesër njerëzit nuk kanë asnjë zgjedhje. Zgjedhjet janë shprehje e vullnetit të lirë të njerëzve. por nesër nuk do të ketë liri dhe nuk do të ketë shprehje vullneti. Zgjedhjet janë mekanizëm kushtetues dhe ligjor, por nesër do të shkelet Kushtetuta dhe ligji në një proces antikushtetues dhe thellësisht kriminal.”
I ndërgjegjshëm që shumica e shqiptarëve kanë dashur dhe kanë pritur që nesër të mos kishte as votime farsë, të mos kishte asgjë, e vetmja mënyrë për ta arritur këtë, tha lideri i opozitës, ishte mënyra e dhunshme, e cila do të shkaktonte vëllavrasje dhe humbje njerëzore e plagë shoqërore.
“Dhuna nuk do të prodhonte as përfitime politike. Ajo thjesht do të sillte një ndjenjë të rremë të triumfit të çastit dhe do të linte plagë të hapura e probleme të pazgjidhura, Unë dhe demokratët nuk besojmë tek rruga e dhunës!
Ndaj sot dua t’i them cdo demokrati dhe qytetari që është bashkuar në përpjekjet tona: Jini të gjithë krenarë, sepse i kemi bërë një shërbim të madh Shqipërisë duke mos rënë pre e dhunës së orkestruar nga Edi Rama!”
Krenar me dinjitetin, qytetarinë dhe kurajon e demokratëve, ky regjim tha Basha është plagosur për vdekje dhe do të rrëzohet shumë shpejt.
“Unë e di, se ka shumë njerëz që mendojnë se me autokratë si Edi Rama, Dhuna është i vetmi mjet për ta hequr, se Edi Rama nuk kupton asnjë gjuhë tjetër, veç asaj të dhunës. Këtë opinion ma kanë shprehur shumë anëtarë dhe mbështetës të Partisë Demokratike. Ma kanë shprehur shumë qytetarë, analistë politikë e të tjerë, por unë nuk besoj se dhuna është zgjidhja,” tha Basha duke besuar se forca demokrate qendron tek drejtësia e asaj që kërkojmë, qëndron tek këmbëngulja, durimi dhe kurajo jonë.
“Asnjë rezultat politik, asnjë pushtet politik që del nga dhuna, nuk ka sjellë kurrë asgjë të mirë për popujt dhe për qeverisjet e tyre. Dhuna prodhon ndërrime mekanike të pushtetit, pa bërë asnjë pastrim dhe transformim. Dhuna krijon përligje kriminale tek ata që vinë në pushtet prej saj. Unë besoj se nga dhuna në 30 qershor nuk përfiton askush përveç Edi Ramës.”
Rrëzimi i Edi Ramës nuk do të vijë duke përplasur shqiptarët me njëri-tjetrin, tha Basha duke theksuar se ku ndryshon ai nga Rama:
“Për pushtetin personal, Rama është gati të çojë shqiptarët në vëllavrasje. Unë kam përgjegjësi për jetën e çdo shqiptari Dhuna dhe viktimat i vlejnë vetëm Edi Ramës. Ai do arsye. Ai kërkon të sigurojë pretekstin e kundërshtarit të dhunshëm për të justifikuar shtetin e tij policor për të justifikuar dhunën dhe abuzimet dhe krimet që ka kryer deri tani. Rrëzimi i Edi Ramës nuk do të vijë duke përplasur shqiptarët me njëri-tjetrin, nuk mund të vijë duke goditur, duke rrahur apo lënduar njëri-tjetrin. Fundi i Edi Ramës po vjen nga braktisja e tij. Nga distancimi prej tij. Nga izolimi i tij. Ky fund është pranë dhe, mbi të gjitha, sepse përpjekjet tona të deritanishme kanë qenë thellësisht europiane, thellësisht parimore dhe jo për pushtet personal. Përgjegjësia dhe detyrimi im kryesor është interesi publik, është mirëqenia e njerëzve. Ky interes vjen mbi çdo interes partiak, vlen para çdo interesi vetjak. Ndryshe nga Edi Rama që për pushtetin e tij personal është i gatshëm t’i çojë nesër shqiptarët në vëllavrasje, unë kam përgjegjësinë për jetën e çdo demokrati, çdo socialisti, çdo qytetari shqiptar. Ndaj, për nesër unë kam vetëm një thirrje: Mos bini pre e instinktit të dhunës! Mos bini pre e provokimeve për dhunë!”
Me këtë rast Kryetari i Partisë Demokratike, ka një apel tjetër shqiptarëve:
“Bojkotoni! Rezistoni! Me qëndresë dinjitoze, me vendosmëri dhe jo dhunë! Unë ju bëj thirrje të mos shkoni të votoni, të bojkotoni! Nëse jeni të detyruar të shkoni në qendrat e votimit nga hakmarrja e regjimit, rezistoni! Regjimit po i vjen fundi! Nuk kanë çfarë t’ju bëjnë!”
Ngrijeni zërin nesër në protesta në rrugë! Sfidojeni regjimin kudo! Në mënyrë paqësore, këshillon Basha, nesër është dita për të treguar vullnet me bashkim, me qëndresë dinjitoze, me vendosmëri dhe jo dhunë!
Në këtë ditë të keqe për Shqipërinë, Kryetari i Partisë Demokratike, Lulzim Basha, bënë thirrje duke theksuar se forca shqiptare janë vlerat që ne tregojmë, parimet mbi të cilat ne veprojmë! Ne duam të jemi europianë dhe duhet të sillemi si europianë, nesër dhe çdo ditë, ndërsa përfundon:
“Nesër duhet dhe do të dallohet qartë diferenca mes autokracisë kriminale të votimeve farsë dhe dinjitetit të një populli të tërë të bashkuar që sfidon regjimin.”
