Bombë në Gjykatë, një i vdekur dhe pesë të plagosur

Një bombë ka shpërthyer në Gjykatën Themelore në Podgoricë me ç’rast ka humbur jetën Mladen Bulatoviç, 40 vjeç nga Podgorica, ndërsa janë plagosur pesë persona.

Shpërthimi, sipas Srgjan Koraç, nga Drejtoria e Policisë, ka ndodhur në orën 11:45 dhe hetimet paraprake flasin për një person i cili ka aktivizuar bombën në hyrje të Gjykatës. Mendohet se kemi të bëjmë me vetëvrasje.

Të plagosurit janë hospitalizuar, tha Koraç, duke shtuar se në mesin e tyre ishte dhe një avokat.

Ndërkohë Drejtorja e Spitalit Klinik të Malit Zi, KCCG, Liljana Raduloviç, tha se në këtë institucion shëndetësor janë paraqitur shtatë persona, pesë prej të cilëve ishin plagosur.

“Procedurat e diagnostifikimit vazhdojnë, në mënyrë që të konstatojmë plagët. E rëndësishme është që të gjithë janë me parametra stabël për jetën,” tha Raduloviç.

Në momentin e shpërthimit të bombës, në Gjykatën Themelore të Podgoricës ishin një numër i madh i njerëzve. 

Të gjithë punonjësit e Gjykatës janë evakuuar ndërsa në vendin e ngjarjes vazhdojnë të qëndrojnë ekipet e Emergjencës, Zjarrfikësve dhe Policisë. 

Hetimet vazhdojnë!