Bora mbulon Bosnje Hercegovinën, rrugë të bllokuara dhe 180 mijë familje pa energji elektrike
Reshjet e dendura të borës që përfshinë sot Bosnje Hercegovinën kanë shkaktuar probleme të mëdha, në veçanti në rrjetin e shpërndarjes së energjisë elektrike ku 180 mijë familje mbetën pa energji elektrike.
Kompania elektroenergjetike e Bosnjes “Elektroprivreda BiH”, sqaroi se gjatë mëngjesit, rreth 180,000 familje mbetën pa energji elektrike, kryesisht në zonën e Qarkut Unsko-Sana, ku mësimet në të gjitha shkollat u anuluan për shkak të situatës së rëndë.
Edhe pse të gjitha ekipet në dispozicion ishin në terren që në orët e mëngjesit, kompania thotë se deri në mesditë arritën të rivendosnin vetëm dy të tretat e rrjetit të dëmtuar të shpërndarjes.
Gjendja më e rëndë raportohet në Bihaç, Bosanska Krupa, Cazin, Sanski Most dhe Kladusha e Madhe.
Ndërkohë situatë e ngjashme raportohet edhe në Qarkun e Tuzlës, ku Çeliqi, Gradaçaci dhe Graçanica mbetën pa energji elektrike.
Reshjet e borës shkaktuan probleme në furnizimin me energji elektrike edhe në Zenicë, Maglaj, Teshnje dhe Zavidovici, si dhe në Bugojno, Donji dhe Gornji Vakuf, Travnik dhe Novi Travnik, Vitez dhe Fojnicë.
Kompania e Banja Lukës “Elektrokrajina”, e cila furnizon pjesët veriore të Republika Srpskas, konfirmoi se tre linja transmetimi të tensionit të lartë dhe 50 linja të tensionit të mesëm ishin jashtë funksionit në territorin e tyre për shkak të borës dhe pemëve të rëna, kështu që shumë familje nuk kishin elektriciteti.
Gjendja e rrugëve në Bosnje Hercegovinë po përkeqësohet orë pas ore për shkak të reshjeve intensive dhe rrugëve të papastruara.
Pjesa më e madhe e rrugëve dhe autostradave kryesore në pjesën veriore dhe qendrore të vendit janë nën borë mbi 20 centimetra të larta dhe kamionë të shumtë traktorë janë bllokuar nga rrëshqitjet e dëborës, gjë që vështirëson qarkullimin dhe pastrimin e rrugëve.
