Bora mbulon Kosovën, krijohen vështirësi në trafik

Moti në Kosovë e rajon ka ndryshuar gjatë orëve të natës. Bora ka mbuluar gjithë vendin, ndërsa që nga mëngjesi janë krijuar vështirësi në trafik, e madje edhe kolona të gjata në rrugën nacionale Fushë-Kosovë- Sllatinë.

Kjo rrugë është bllokuar nga kamionë e autobusë, për shkak të mos pastrimit të autostradës nga mirëmbajtësit.

Ndryshe, Instituti Hidrometeorologjik i Kosovës ka parashikuar se gjatë fundjavës do të ketë reshje bore.

Sot pritet të mbajë mot kryesisht i vranët dhe me reshje shiu dhe bore. Temperaturat minimale do të lëvizin ndërmjet -1 deri 0 °C, ndërsa maksimalet e ditës parashihen të lëvizin ndërmjet 0-3 °C.

Ndërsa nesër, IHK parashikon mot të vranët dhe vende-vende me fjolla të dobëta bore. Temperaturat minimale do të lëvizin ndërmjet -3 deri -1 °C, ndërsa maksimalet e ditës parashihen të lëvizin ndërmjet 0 deri 2 °C.