Bora paralizon Holandën, anulohen 500 fluturime, trenat nuk funksionojnë! Kritike edhe në Britani
Kaosi me dëborën paralizoi sot Holandën, duke shkaktuar probleme të mëdha për trafikun ajror, hekurudhor dhe rrugor. Qindra fluturime u anuluan dhe trenat rreth Amsterdamit u ndaluan për shkak të reshjeve të dendura të dëborës, raporton Reuters.
Kolaps i plotë në Aeroportin Schiphol
Aeroporti Schiphol i Amsterdamit, një nga qendrat më të ngarkuara të Evropës, anuloi pothuajse 500 fluturime këtë mëngjes. Ai ishte i mbyllur për të gjitha fluturimet hyrëse deri në mesditë për shkak të dëborës, raportoi agjencia e lajmeve ANP. Aeroplanët që duhej të uleshin në Amsterdam u devijuan në aeroporte të tjera. Problemet me dëborën dhe akullin kanë vazhduar prej ditësh, dhe aeroporti është detyruar të anulojë qindra fluturime çdo ditë që nga e premtja.
Trafiku hekurudhor dhe rrugor paralizohet
Bora, e cila mbuloi pjesën më të madhe të Holandës këtë mëngjes, ka shkaktuar kaos edhe në tokë. Kompania holandeze hekurudhore NS konfirmoi se trenat nuk po qarkullojnë në zonën më të madhe të Amsterdamit, dhe transporti publik ishte gjithashtu në një gjendje kolapsi në shumë pjesë të tjera të vendit.
Akulli dhe bora kanë shkaktuar gjithashtu vonesa të shumta dhe aksidente rrugore, duke i bërë autoritetet t’u bëjnë thirrje qytetarëve të qëndrojnë në shtëpi nëse është e mundur. Sipas parashikimeve, reshjet e borës në Holandë pritet të vazhdojnë gjatë gjithë javës.
Britani e Madhe, mbyllen shkollat dhe anulohen fluturimet
Reshjet e borës kanë detyruar mbylljen e qindra shkollave në të gjithë Skocinë, Wellsin dhe Irlandën e Veriut, ndërsa ndërprerjet e udhëtimit kanë prekur pjesë të mëdha të Mbretërisë së Bashkuar.
Paralajmërimet e motit për borë të madhe janë në fuqi në Skocinë veriore, sipas shërbimit kombëtar meteorologjik Met Office. Rrugët janë bërë të pakalueshme në disa zona, me shërbime treni dhe fluturime të anuluara.
“Ndërsa fillojmë javën e parë të plotë të punës së vitit, përballemi me një sërë rreziqesh të motit dimëror me reshje bore dhe akull,” tha meteorologu kryesor i Met Office, Matthew Lehnert duke shtuar se kushtet në vende të tjera të Mbretërisë së Bashkuar do të mbeten sfiduese.
Moti i ftohtë ka shkaktuar gjithashtu paralajmërime shëndetësore. Agjencia e Sigurisë Shëndetësore e Mbretërisë së Bashkuar, UKHSA, ka lëshuar alarme të kuqe për të ftohtin për Anglinë deri më 6 janar.
“Ndërsa moti i ftohtë fillon, është jetike të kontrolloni miqtë, familjen dhe fqinjët që janë më të prekshëm,” tha Kreu i Ngjarjeve Ekstreme dhe Mbrojtjes së Shëndetit në UKHSA, Agostinho Sousa, duke u u bërë thirrje njerëzve të kenë kujdes.
