Bordet e Edi Ramës, Berisha: Po vjedhin, plaçkisin, grabisin çdo ditë qytetarët shqiptarë!

Sot Kryetari i PD, Sali Berisha, në konferencës e tij të përjavshme kërkojë ndërprerjen urgjente të veprimtarisë së Bordeve të Edi Ramës, të cilat po vjedhin, plaçkisin, grabisin çdo ditë qytetarët shqiptarë.

I pashmangshëm ishte dhe trajtimi i refuzimit nga Edi Rama i Rezolutës së dorëzuar nga PD në Parlament për denoncimin e gjenocidit serb në Kosovë, që për Berishën, është një akt makabër antikombëtar, është një përdhosje, është një ekzekutim për së dyti i mbi 10 mijë fëmijëve, grave, burrave të cilët u masakruan në vitet 1998-1999.

“Ky vendim, apo ky akt i Edi Ramës dëshmon qartë se Tirana nuk është gjë tjetër veçse një Beograd i vogël. Dhe se, jo interesat kombëtare të shqiptarëve, por interesat çnjerëzore ekspansioniste të Beogradit janë preferenca dhe përparësia e qeverisë së Tiranës.”

Në fund, interesimit të mediave për qëndrimin e PD me rastin e procesit të votimit për President të Republikës, Kryetari i Partisë Demokratike, Sali Berisha, iu përgjigj me një sqarim përfundimtar:

“Ne nuk i njohim të drejtë legjitime Ramës për të propozuar Presidentin duke pasur parayssh masakrën, batërdinë e madhe zgjedhore që ai bëri me armatën e patronazhistëve, me përdorimin e të gjitha segmenteve të shtetit, me përdorimin e dumanëve dhe bandave dhe sasive kolosale të parave të krimit. Rrugëzgjidhja e vetme do të ishte e drejtë një President i propozuar nga opozita.

Rama në vend të kësaj praktike e cila është ndjekur në rastet analoge në Shqipëri, bazuar në dokumente ndërkombëtare, zgjodhi lojë me kukulla opozitë, një lojë si një shpifësirë politike e neveritshme. I kaloi raundet me gjasme se po pret nga opozita, dhe tani mbledh kryesinë për të komunikuar Presidentin dhe për të marrë 100% të pushteteve në këtë vend, njësoj si Aleksandër Lukashenko. Rama do të quhet nesër Lukashenko biss, ai sot ka 99% të pushtetit, me marrjen e Presidencës shkon në pushtet absolut. Kjo është një detyrë urgjente e opozitës së vërtetë që ti japin Ramës përgjigjen më të merituar dhe kohën më të shkurtër të mundshme,” tha Kryetari i PD, Sali Berisha, duke deklaruar se deputetët e PD do votojnë kundër ndërsa kujtoi Rezolutën e Këshillit Kombëtar që nuk pranohet bojkot, por do votohet kundër.

Deklaratë

Bordet antikushtetuese janë shndërruar në mega-shushunjat e Edi Ramës të cilat po vjedhin, plaçkisin, grabisin çdo ditë qytetarët shqiptarë. Mjafton t’ju rikujtoj këtu se çmimi i naftës dje në Maqedoninë e Veriut ishte 185 lekë, kundrejt 2500 lekë në Shqipëri. Çmim i tillë nafte nuk ekziston kund në Europë dhe botë përveçse në çifligun e Edi Ramës që shpiku këtë mekanizëm duke dhunuar Kushtetutën, duke dhunuar ligjet natyrale të tregut, për të plaçkitur qytetarët e vet së bashku me klientelën e tij. 

Të dhënat e politikave që ndoqi Edi Rama ndaj shqiptarëve janë tejet alarmante. Ju keni lexuar këto ditë, organizatat më prestigjioze për fëmijë kanë dhënë alarmin se 300 mijë fëmijë shqiptarë kërcënohen për ushqimin e tyre të përditshëm. 

Shqipëria nuk mund të ketë, asnjë vend i lirë nuk mund të ketë, borde të cilat të kontrollojnë tregun për llogari të qeverisë. Qytetarët vetëm paguajnë çmimin e këtyre organizmave korruptive qeveritare të ngritura me qëllimin e vetëm për të diktuar çmime stratosferike dhe vjedh sa më shumë qeveria me klientelën e vet. 

Dhe njëherë, kërkoj ndërprerjen urgjente të veprimtarisë së tyre. Kërkoj dhe u bëj thirrje anëtarëve të bordit të japin dorëheqje menjëherë, të mos shndërrohen në një vegël antikushtetuese të një qeverie e cila me vendimet e saj është shndërruar tashmë e njohur univeralisht si një organizatë kriminale. 

Çështja e dytë, e një rëndësie të jashtëzakonshme është qëndrimi i Edi Ramës ndaj rezolutës të dorëzuar nga ne në Parlament për denoncimin e gjenocidit serb në Kosovë. Refuzimi nga qeveria aktuale pseudomazhoranca aktuale, për të denoncuar gjenocidin serb në Kosovë, është një akt makabër antikombëtar, është një përdhosje, është një ekzekutim për së dyti i mbi 10 mijë fëmijëve, grave, burrave të cilët u masakruan në vitet 1998-1999 në suazën e operacionit ‘Patkoi’, operacion që kishte për qëllim dhunën masive, masakrat dhe përzënien masive të shqiptarëve nga Kosova. Ky vendim, apo ky akt i Edi Ramës dëshmon qartë se Tirana nuk është gjë tjetër veçse një Beograd i vogël. Dhe se, jo interesat kombëtare të shqiptarëve, por interesat çnjerëzore ekspansioniste të Beogradit janë preferenca dhe përparësia e qeverisë së Tiranës. 

Kjo situatë po shkon drejt një drame të vërtetë. Nuk ka patriotë shqiptarë, nuk ka qytetarë të vërtetë shqiptarë që mund të pranojë rreshtimin e Tiranës me Beogradin në qëndrimin ndaj gjenocidit serb në Kosovë. Një qëndrim të tillë mbajti Edi Rama dhe tre javë më parë me rezolutën për dënimin e gjenocidit serb në Srebrenicë. Imagjinoni pra, se kush qeveris këtë vend. 

Mbrojtja dhe mohimi i gjenocidit dënohet me ligj ndërkombëtar. Në vend që të kushtëzohet çdo qëndrim ndaj Beogradit me njohjen e gjenocidit serb në Bosnje dhe Kosovë, mohohet gjenocidi, mohohen qindra mijëra të rënë, shpirtra të vdekur dhe kjo vetëm për shkak të vasalitetit absolut të Edi Ramës ndaj Vuçiçit. Ka ardhur koha që çdo shqiptar të mendojë mirë për interesin e tij kombëtar, për dinjitetin e tij kombëtar. Gjenocidi serb e kam theksuar këtu para jush dhe në takime të tjera, në vitin 1913 në zonën e Lumës, Krumës, Tropojës dhe Dibrës, ka njohur formën më të egër në Luftën e Parë Botërore dhe kjo është e certifikuar nga Komisioni Ndërkombëtar i ngritur për hetimin e kryera gjatë luftës dhe të shkaqeve të saj. Megjithatë, në rezolutën që dorëzuam ne u ndalëm vetëm te gjenocidi i kryer nga Beogradi në vitet 98-99 në Kosovë. Por gjenocidi serb ndaj shqiptarëve është ciklik. Ai ka filluar në 1874 dhe mbaron në vitin 1999, me disa valë, me disa cikle. Kemi të bëjmë me një qeveri antishqiptare e cila qeve ris vendin për interesa të Beogradit dhe kjo është e padurueshme, është e patolerueshme.    

Dy janë çështjet shqetësimet më themelore sot, shushunjat, bordet e Edi Ramës që po boshatisin xhepat e shqiptarëve dhe po i varfërojnë dhe mjerojnë ata gjithnjë e më shumë; shkelmimi i interesit kombëtar nëpërmjet mohimit të gjenocidit të shqiptarëve. Unë kam besim të madh se qytetarët shqiptarë do t’i japin përgjigje më të merituar në një kohë të ardhshme dhe PD do të angazhohet, do t’i kërkojë të angazhohet në një debat me qytetarët për t’i dhënë përgjigjen më të merituar kësaj qeverie antishqiptare.