“Bordi i Paqes” për Gazën, Presidenti Trump fton Vladimir Putinin dhe Edi Ramën

Pas neverisë që shprehën shqiptarët me ftesën e Presidenti amerikan Donald Trump për diktatorin e tyre Edi Rama që të marrë pjesë në “Bordin e Paqes” për Gazën, sot nga Moska vjen një lajm që zhvlerëson këtë absurditet! Zëdhënësi i Kremlimit, Dmitry Peskov, konfirmon se Presidenti Trump ka ftuar Presidentin e Rusisë, Vladimir Putin, të bashkohet me “Bordin e Paqes” për Gazën.

“Po, Presidenti Putin ka marrë gjithashtu një ftesë përmes kanaleve diplomatike për t’u bashkuar me këtë Bord. Aktualisht po shqyrtojmë të gjitha detajet e këtij propozimi dhe po presim kontakt me palën amerikane për të sqaruar të gjitha detajet,” tha Dmitry Peskov.

Edi Rama cilësohet nga Opozita Shqiptare si Kryeministër i një Narkoshteti që ndikoi në tregjet botërore të drogës dhe pat shqetësuar në masë të madhe kreun e Venezuelës Maduro me bandat e tij të kokainës, ndërsa Vladimir Putin, është njeriu që nisi një pushtim të plotë të Ukrainës pothuajse katër vjet më parë dhe shqetësoi gjithë botën duke shkaktuar luftën më të madhe në Evropë që nga Lufta e Dytë Botërore, ku numri i viktimave mund të kalonë edhe shifrën 500 mijë.

Çfarë është Bordi i Paqes?

Kujtojmë se krijimi i “Bordit të Paqes” u njoftua javën e kaluar, disa muaj pasi u arrit një armëpushim i brishtë në Gaza, si një organ për të mbikëqyrur demilitarizimin dhe rindërtimin e Gazës, si dhe krijimin e një qeverie kalimtare palestineze.

Megjithatë, mediat amerikane, bazuar në draftin e kartës, tani po shkruajnë se Trump e parashikoi Bordin si një institucion me kompetenca më të gjera, një lloj alternativë ndaj Kombeve të Bashkuara, një organizatë që ai e ka kritikuar prej kohësh.

“Jam i nderuar të njoftoj themelimin e BORDIT TË PAQES. Anëtarët e tij do të shpallen së shpejti, por mund të them me besim se ky është Bordi më i Mirë dhe më Prestigjioz që është formuar ndonjëherë kudo,” u shpreh Presidenti Trump të premtën përmes rrjetit social Truth.

Bloomberg shkruan se Bordi përshkruhet në statutin e tij si “një organizatë ndërkombëtare qëllimi i së cilës është të promovojë stabilitetin, të rivendosë qeverisjen e besueshme dhe legjitime dhe të sigurojë paqe të qëndrueshme në zonat e prekura nga ose të kërcënuara nga konflikti”.

Ndërkohë The Atlantic shkruan se më shumë informacion do të shpallet në Forumin Ekonomik Botëror në Davos, i cili fillon sot. Presidenti i SHBA-së njoftoi se Bordi do të përbëhet nga “udhëheqësit më të rëndësishëm të kombeve më të rëndësishme”.

Bloomberg shkruan se Trump do të jetë presidenti i tij i parë dhe do të vendosë se kush është anëtar, dhe secili vend do të marrë pjesë në punën e këtij organi për jo më shumë se tre vjet nga hyrja në fuqi e kartës, përveç nëse paguan një miliard dollarë.

Vendimet do të merren me votën e shumicës së shteteve, por me konfirmimin e presidentit të atij organi, raporton media amerikane.

Shtëpia e Bardhë tha se raporti i Bloomberg ishte i gabuar dhe theksoi se nuk ka çmim për t’u bashkuar me Bordin, raporton Agjencia e lajmeve Reuters.

“Ai thjesht siguron anëtarësim të përhershëm për vendet partnere që demonstrojnë një angazhim të thellë për paqen, sigurinë dhe prosperitetin,” u shpreh Shtëpia e Bardhë përmes rrjetit social X.