Borë në pranverë, ARRSH: Drejtuesit e mjeteve të pajisen me zinxhir në këto akse…

Zyrtarisht jemi në pranverë, shqiptarët festuan madje edhe Ditën e Verës, por sot u zgjuan në mëngjes me petkun e bardhë të dëborës ndërsa Autoriteti Rrugor Shqiptar, ARRSH, rekomandon drejtuesit e mjeteve nëse udhëtojnë në zonat me prezencë dëbore ose zonat malore të pajisen me zinxhir.

“Reshje dëbore ka pasur në Dedaj-Bogë, Dedaj-Razëm, Bogë-Theth, Hani i Hotit-Doganë Vermosh, Kukës-Bushtricë, Kukës-Shishtavec, Pukë-Qafëshllak, Trau Dajt-Qafë Priskë-Qafë Mollë, Llogara, Skërficë, Libonik-Rëmbec-Plasë, Lin-Pogradec, Korçë-Voskopojë, K/Boboshticë-Dardhë, Ersekë-Leskovik, Zgosht-Sebisht, Korçë-Ersekë, Qafa e Zvezdës-Zemblak-Goricë,” thekson Autoriteti Rrugor Shqiptar duke bërë të ditur se kontraktorët janë në terren për të bërë pastrimin e akseve rrugore menjëherë pa sjellë probleme me qarkullimin ndërsa rekomandon:

“Drejtuesit e mjeteve të kenë kujdes të shtuar gjatë drejtimit të mjetit, të pajisen me goma dimërore dhe zinxhir kur udhëtojnë për në zonat malore me prezencë dëbore.”

Ndryshe, ndonëse reshje të dëborës kishte gjatë natës dhe në orët e para të mëngjesit, në zonën veriore dhe juglindore të vendit, për shkak të klimës mesdhetare në pranverë, dëbora ka nisur të shkrijë duke mbetur kryesisht në zonat malore.