Borrell: Arrestime të jashtëligjshme të serbëve! Kurti: Pretendimet e rreme ndezin tensionet!
Pas alarmit të Përfaqësuesit të Lartë për Politikë të Jashtme dhe Siguri të Bashkimit Evropian, Josep Borrell, nga situata në veri të vendit të Kosovës duke i quajtur të jashtëligjshme arrestimet e serbëve në Kosovë ndërsa përmendi dhe marshimin e pjesëtarëve të Forcës së Sigurisë së Kosovës në Mitrovicë, ka reaguar Kryeministri i Kosovës, Albin Kurti, duke theksuar se përhapja e panikut dhe pretendimeve të rreme veç sa ndez tensionet.
“Arrestime jashtëgjyqësore të serbëve të Kosovës dhe Forcave të Sigurisë së Kosovës që marshojnë në Mitrovicën e Jugut; e ndjekur nga retorika e rëndë nga Serbia. Pavarësisht takimit të djeshëm të krizës, përshkallëzimi vazhdon dhe po bëhet i rrezikshëm. Nuk do ta tolerojmë,” shprehet Josep Borell përmes rrjetit social Twitter duke bërë sikur është i shqetësuar ndonëse i deklaron dy të pavërteta.
Pas këtij “alarmi” të shefit të diplomacisë evropiane, Kryeministri i Kosovës, Albin Kurti, i befasuar si çdo kosovar ishte i prerë:
“Përhapja e panikut dhe pretendimeve të rreme veç sa ndez tensionet dhe ndihmon ata që kërkojnë t’i përshkallëzojnë ato,” shprehet Albin Kurti përmes rrjetit social Twitter” duke i bërë thirrje të gjithëve që t’i konfirmojnë burimet e tyre dhe të presin informacione zyrtare nga institucionet e Kosovës përpara se të vendosin të angazhohen publikisht në transmetimin e lajmeve ose parashikimin e ngjarjeve.
Kryeministri i Kosov ka sqaruar se arrestimi i sotëm i një serbi është bazuar në provat e shumta dhe në përputhje me Kodin e Procedurës Penale dhe të drejtat e procesit të rregullt ligjor për sulmin e kryer mbi ushtarët e KFOR-it në Zveçan në 29 maj.
“Si kryeministër i një shteti demokratik nuk kam asnjë përfshirje në hetime dhe arrestime,” shprehet Kryeministri Kurti ndërsa për stërvitjet e sotme nga Regjimenti III i Forcës së Sigurisë së Kosovës në Mitrovicën e Jugut, sqaroi se ai ka qenë një aktivitet rutinë, i planifikuar çdo vit, për të cilin KFOR-i ishte plotësisht i informuar.
“Ai përbëhej nga 215 ushtarë që shkonin nga garnizoni ‘Minatori’ në Frashër dhe ktheheshin. Dezinformimi është i rrezikshëm dhe i papranueshëm,” tha Kryeministri i Kosovës, Albin Kurti.
Ndryshe, arrestimi që ka alarmuar Përfaqësuesin e Lartë për Politikë të Jashtme dhe Siguri të Bashkimit Evropian, Josep Borrell, është arrestimi i kriminelit serb Nenad Orloviç i njohur në Mitrovicën e Veriut si “Rusi”, pas hetimeve intensive të autoriteteve kosovare për përfshirje në sulmin dhe rrezikimin e personave nën mbrojtje ndërkombëtare, KFOR.
