Borrell: Ballkani Perëndimor, i rëndësishëm për BE-në

Ministrat e jashtëm të Bashkimit Evropian në takim me homologët e tyre nga Ballkani Perëndimor sot në Bruksle pritet të diskutojnë propozimet e fundit të Komisionit për Zgjerim si dhe harmonizimin e politikave të Politikës së Jashtme të BE-së si dhe sanksionet, meqë disa vende kanë devijzuar në këtë drejtim

Përfaqësuesi i Lartë për Politikë të Jashtme dhe Siguri, Josep Borrell, në fillim të takimit tha se takimi me gjashtë ministrat nga Ballkani Perëndimor dëshmon se sa i rëndësishëm është rajoni për Bashkimin Evropian.

“Do të diskutojmë propozimet e fundit të Komisionit për zgjerim, do këmbëngulim në nevojën për të ndjekur më nga afër politikën tonë të jashtme. Disa vende nuk kanë harmonizuara politikat me politikën e jashtme të BE-së, si dhe sanksionet,” tha Borrell ndërsa ministrja e Jashtme e Gjermanisë, Analean Baerbock tha se oferta e paqes dhe sigurisë në Bashkimin Evropian është mburoja më e rëndësishme, veçanërisht për partnerët dhe miqtë në Ballkanin Perëndimor.

“Kjo është arsyeja pse është kaq e rëndësishme që ne të kuptojmë në këto kohë se zgjerimi është një çështje gjeopolitike, se nuk duhet të ketë zona gri për paqen dhe sigurinë në Evropë. Prandaj jam shumë e kënaqur që Ministri i Jashtëm dhe Ministrat e Jashtëm të gjashtë shteteve të Ballkanit Perëndimor janë sërish këtu sot për të shkëmbyer ide,” tha shefja e diplomacisë gjermane para fillimit të takimit.

Sipas paralajmërimeve nga selia e BE-së, gjatë takimit të përbashkët me ministrat e Ballkanit Perëndimor do të trajtohet situata e sigurisë në Ballkanin Perëndimor si dhe bashkëpunimi mes BE-së dhe vendeve të rajonit në fushën e politikës së jashtme dhe sigurisë.

Ndryshe, Shqipërinë në këtë takim e përfaqëson ministri për Evropën dhe Punët e Jashtme, Igli Hasani, ndërsa Kosovën, ministrja e Jashtme, Donika Gërvalla.