Borrell dhe Kurti: Rinisja e dialogut Kosovë-Serbi, në qershor

Rinisja e dialogut ndërmjet Kosovës dhe Serbisë do të ndodhë para fundit të qershorit, tha Përfaqësuesi i Lartë për Politikë të Jashtme dhe Siguri i Bashkimit Evropian, Josep Borrell, pas takimit në Bruksel me kryeministrin e Kosovës, Albin Kurti.

Kurti konfirmoi se Kosova do të marrë pjesë në rifillimin e dialogut në muajin qershor. Ai tha se dialogu nuk do të neglizhohet nga ana e Prishtinës, mirëpo siç tha ai, ky proces duhet të zhvillohet mbi bazën e parimeve.

“Javën tjetër në Prishtinë ne do të miratojmë programin qeverisës dhe planin e punës, dhe pastaj ai do të dërgohet në kuvend. Në anën tjetër, neve na duhen më shumë dokumente për dialogun e kaluar, që të përgatitemi. Në maj do të takohemi me opozitën, për të pasur qëndrimet e tyre. Së pari do të kemi darkën e liderëve të Ballkanit Perëndimor në maj dhe pastaj dhe në qershor do të fillojmë me kapitullin e ri të dialogut”, tha Kurti.

Ndërkaq, shefi i diplomacisë së BE-së, Borrell, tha se Kosova nuk ka alternativë tjetër përveç dialogut me Serbinë dhe se rruga e saj evropiane kalon përmes këtij dialogu.

“Rruga evropiane e Kosovës kalon përmes dialogut Kosovë-Serbi, nuk ka rrugë tjetër dhe nuk ka alternativë. Arritja e një marrëveshjeje gjithëpërfshirëse me Serbinë është thelbësore për të lëvizur në perspektivën evropiane. Në të kundërtën, rruga do të jetë e bllokuar”, tha Borrell pas takimit në Bruksel me kryeministrin e Kosovës, Albin Kurti.

“Nuk do të jetë e lehtë, por për përfitimin e njerëzve në Kosovë dhe Serbi dhe në rajon duhet që ky proces të vazhdojë shumë shpejt”, tha Borrell.

Sot Kurti është takuar edhe me presidenten e Komisionit Evropian, Ursula von der Leyen, raporton RFE.

Më pas Kryeministri Albin Kurti ka mbajtur një fjalim në Komitetin për Punë të Jashtme të Parlamentit Evropian ku ka folur për parimet që duhet ndjekur në dialogun me Serbinë ndërsa e tha qartë se Kosova ulet në tavolinën e bisedimeve si palë e barabartë me Serbinë.

“Detyrimi im që të mbrojë pavarësinë e Kosovës, ne jemi për dialog por për një dialog të mirë përgatitur dhe me parime. Së pari është pranimi i  realitetit, pavarësia e Kosovës në bazë të Pakos së Ahtisaarit ka qenë kompromis, hapja e kësaj pakoje do të thoshte hapje e listës së dëshirave e shtytjeve që do të qonin në pasoja të padëshirueshme. Parimi i dytë është që Serbia duhet të pranojë të vërtetën dhe krimet dhe gjenocidin që ka kryer për të cilin NATO është dashur ta bombardojë regjimin e Beogradit, edhe pas luftës në Kosovë, qeveria e re në Serbi nuk është distancuar nga Millosheviqi. Parimi tretë është barazia e përfaqësuesve, në çdo tryezë ulemi të barabartë, Kosova nuk është çështje por palë në dialog kjo duhet të kuptohet para çdo takimi,” tha Kurti duke shtuar se çështja e parë që duhet të zgjidhet në bisedimet me Serbinë është fati i të pagjeturve.

“Çështja e parë që duhet të zgjidhim është fati i të pagjeturve, nëse nuk bëjmë përparim në këtë temë vështirë që mund të bëjmë përparim në fusha tjera.”

Ndërsa dy zëvendësit e Kurtit, Donika Gërvalla dhe Besnik Bislimi folën për FSK-në përkatësisht vaksinat.

Zv/Kryeministrja dhe Ministrja e Jashtme, Donika Gërvalla para eurodeputetëve tha se u kthye në Parlamentin Europian pas 13 vjetësh kur si e re shkoi atje bashkë me presidentin Ibrahim Rugova i cili pranoi çmimin Sakharov.

“Pas kaq shumë vitesh po kthehem këtu për t’i falënderuar për një mbështetje kaq të madhe për gjithë këto vite të vështira për neve.”

Për misionin paqeruajtës të FSK-së jashtë vendit, Gërvalla tha se tregon që përveç se ka stabilitetit në Kosovë, kosovarët duan ta kthejnë të mirën që iu bë atyre në kohën më të vështirë.

“FSK është institucioni që ka besimin më të madh në vendin tonë. Jemi varur nga vende të tjera për siguri dhe paqe dhe tash edhe me kontingjent të vogël duam të kthejmë këtë nder. Ne nuk jemi vetëm për të marrë paqe, por edhe për siguruar atë. Në një frymë të tillë duhet të interpretohet se jo vetëm që kemi stabilitet në vend por edhe mund të dërgojmë stabilitet në vendet tjera,” tha Gërvalla duke shtuar se janë duke punuar shumë për të marrë edhe njohjen nga pesë vendet anëtare të BE-së.

Zv/Kryeministri Besnik Bislimi para eurodeputetëve ka theksuar nevojën e Kosovës për më shumë vaksina, duke kërkuar nga Bashkimi Evropian më shumë ndihmë në këtë drejtim.

“Kosova është i vetmi vend në rajon që ka refuzuar të marrë vaksina që nuk kanë plotësuar kriteret dhe standardet evropiane dhe mu për këtë arsye ne varemi nga ndihma e BE-së,” tha Bislimi duke shtuar se të mërkurën pritet që në Kosovë të vijë kontingjenti i radhës i vaksinave.

Bisssslimi shprehu kënaqësinë që vendet e BE-së po marrin sasi të mëdha të vaksinave pasi sipas tij Kosova pastaj mund të llogarisë në ndihmën e tyre.