Borrell: Marrëveshja Kosovë-Serbi, ndër prioritetet kryesore

Marrëveshja midis Kosovës dhe Serbisë do të jetë në mesin e prioriteteve të Përfaqësuesit të ri për Politikë të Jashtme dhe Siguri pranë BE, Joseph Borrell.

Në seancën e konfirmimit në Parlamentin Evropian, sot Joseph Borrell paralajmëroi se udhëtimi i tij i parë si shef i diplomacisë evropiane do të jetë në kryeqytetin e Kosovës, Prishtinë, raporton RFE.

Duke theksuar se dialogu është zhvilluar “shumë gjatë”, Borrell premtoi se do t’i kushtojë vëmendje të posaçme këtij procesi.

Të dyja palët, sipas tij, duhet të tregojnë përkushtim. Nga Kosova, tha se pret të heqë taksën e vënë ndaj prodhimeve të importuara nga Serbia, ndërsa nga Serbia kërkoi angazhim të sinqertë në dialog.

I pyetur se sa do të jetë i besueshëm roli i tij, duke marrë parasysh se përfaqëson Spanjën, një shtet që nuk e ka njohur Kosovën, Borrell tha se njohja është përgjegjësi e secilit shtet anëtar të BE-së dhe se Spanja nuk është problem në këtë drejtim.

“Për aq kohë sa nuk e njohin Rusia dhe Kina, Kosova nuk mund të jetë shtet,” tha Përfaqësuesi i ardhshëm i Lartë për Politikë të Jashtme dhe Siguri pranë BE, Joseph Borrell, duke treguar se bolsheviku i radh po vjenë në krye të BE ndërsa harron se Krimea nuk është shtet edhe pse e njeh Rusia.

Bashkimi Evropian, këtë javë pritet të emërojë edhe një Të dërguar të posaçëm për dialogun për normalizimin e marrëdhënieve midis Kosovës dhe Serbisë.

Ndërkohë më 3 tetor, Presidenti i Shteteve të Bashkuara, Donald Trump, ka zgjedhur ambasadorin amerikan në Gjermani, Richard Grenell, Përfaqësues të Posaçëm të administratës së tij në dialogun Kosovë-Serbi.

Emërimi i Grenellit është bërë përkundër faktit që Departamenti amerikan i Shtetit ka emëruar Matthew Palmer si Të dërguar të posaçëm për Ballkanin, në fund të muajit gusht.

Ndryshe, seanca dëgjimore për Joseph Borrell u zhvillua një ditë pasi në Kosovë u mbajtën zgjedhjet e parakohshme parlamentare, rezultatet e të cilave nxorën fituese opozitën e deritashme.

Në Parlamentin Evropian do të mbahen 26 seanca dëgjimore deri javën e ardhshme, për secilin komisionar të emëruar.

Më 23 tetor, Parlamenti voton për Komisionin e ri Evropian që merr detyrën më 1 nëntor të këtij viti.