Borrell: Nuk mund të jemi aktor global nëse nuk i zgjidhim problemet në Ballkan

Përfaqësuesi i Lartë për Politikë të Jashtme dhe Siguri pranë Bashkimit Evropian, Josep Borrell, tha sot se zgjidhja e problemeve në Ballkan është një përgjegjësi e Bashkimit Evropian, dhe se nga kjo varet edhe roli global i BE-së.

“Nëse nuk mund të zgjidhim problemet në Ballkan atëherë si mund të jemi aktor i rëndësishëm global,” tha Borell me rastin e 10 vjetorit të krijimit të Shërbimit të Veprimit të Jashtëm të BE-së, raporton RFE, ceremoni ku morën pjesë edhe dy paraardhësit e tij, Javier Solana dhe Federika Mogherini.

Duke fol për dialogun mes Kosovës dhe Serbisë, Borrell përsëriti se ky problem duhet të zgjidhet në kuadër të perspektivës evropiane. Në anën tjetër, ai mirëpriti edhe gatishmërinë e Shteteve të Bashkuara për të ndihmuar në këtë proces.

“Na vjen mirë që SHBA-të duan të ndihmojnë, por është BE-ja ajo që udhëheq këtë proces. Vetëm BE mund të paraqes ofertën e rëndësishme për njerëzit atje dhe ajo është perspektiva evropiane. Në kuadër të kësaj perspektive duhet të zgjidhet problemi,” tha Borell duke shprehur edhe një herë kënaqësinë për rifillimin e dialogut mes Kosovës dhe Serbisë, që në fillim të mandatit të tij.

Ish-Përfaqësuesi i parë i lartë i BE-së prej kur është krijuar ky post, Javier Solana, tha se problemi mes Kosovës dhe Serbisë duhet të zgjidhet përmes dialogut, por edhe duke i ofruar një rrugë më të shpejtë Serbisë drejt BE-së. Këtë Solana e ka lidhur edhe me ndikimin e Rusisë në rajon e sidomos në Serbi.