Borxhi janar- mars, shpenzimet për interesat me rritje rekord  

Në tremujorin e parë të vitit 2024 borxhi publik në raport me PBB shënoi ulje me 55.7 për qind me rënie 3,1 pikë për qind në raport me fundin e vitit 2023, por për të njëjtën periudhë shpenzimet për interesat e borxhit shënuan rritje rekord.

Shpenzimet buxhetore për shlyerjen e interesave të borxhit publik pësuan rritje të fortë në tremujorin e parë të vitit 2024, sidomos ato për borxhin e brendshëm.

Të dhënat zyrtare nga Ministra e Financave tregojnë se shpenzimet për shlyerjen e interesave arritën më 1,6 miliardë lekë në janar-mars 2024, ose 38 për qind më shumë në krahasim me të njëjtën periudhë të vitit 2023.

Të dhënat tregojnë së rritjen më të fortë e kishin interesat për financimin e borxhit të brendshëm. Për tre-mujorin e parë u shlyen 13,3 miliardë lekë interesa për huamarrjen e brendshme nga 9,1 miliardë lekë në të njëjtën periudhë të vitit 2023 me rritje 32 për qind, ndërsa për interesat e huave të jashtme shpenzimet u rriten me 9 %.

Të dhënat tregojnë se interesat e borxhit të brendshëm janë ulur në tre-muajt e parë të vitit 2024, por shpenzimet duket se janë nxitur nga shlyerjet e emetimeve për borxhin afatshkurtër, bono thesari 3 dhe 6- mujore stoku i të cilave është rritur më 2024. Instrumentet afatshkurtër zënë 29 për qind të totalit të borxhit, nga 28.7 që ishin në fund të vitit 2023.

Interesi mesatar i ponderuar i shlyerjes së borxhit ishte rreth 4,5% në tremujorin e parë 2024, në nivele gati të ngjashme me vitin e kaluar sipas të dhënave të Ministrisë së Financave, ndërkohë që numri i ditëve për rifinancimin e borxhit shënoi rritje të shpejtë në tremujorin e parë me rreth 920 ditë nga rreth 820 ditë me në fund të vitit 2023.

Ministria e Financave pret që këtë vit shpenzimet për interesa parashikohen në vlerën 66.2 miliardë lekë ose 2.8% të PBB, duke përfshirë në këtë shumë dhe kontigjencën për rreziqet e borxhit. Në terma realë, shpenzimet për interesa do të rriten me 0.3 pikë përqindje ndaj PBB-së krahasuar me buxhetin e vitit 2023.

Ministria e Financave ka parashikuar ketë vit një fond kontigjence prej 5.3 miliardë lekësh për të mbuluar rreziqet e lidhura me rritjen e shpenzimeve të shërbimit të borxhit. Edhe fondi i kontigjencës do të jetë në rritje, me 8.2% krahasuar me shifrat e parashikuara në buxhetin e vitit 2023./Monitor/