Bregu i Lumit/ Protestë, Banorët: Edi Rama, mos na provoko!

Banorët e  Bregut të Lumit janë sot në protestë kur skadon dhe afati për largimin nga shtëpitë e tyre me urdhër të bashkisë së Tiranës. Kjo e fundit thekson se do të vazhdojë ndërtimi i Bulevardit të ri të Tiranës ndërsa banorët janë të shqetësuar sepse ata nuk shpronësohen, ndryshe nga fqinjët e tyre vetëm disa hapa më tej dhe janë të bindur se po diskriminohen.

“I lutem Kryetarit të Bashkisë dhe Kryeministrit, të mos na provokojnë,” tha njeri nga protestuesit.

“Sot është afati i fundit, ne shtëpinë tona nuk e lirojmë. Na ka vënë dhe 5 milionë lekë të vjetra gjobë për të liruar shtëpinë. Po nuk është e drejtë të dal në rrugë kur kam që në vitin 2005 që kam kërkuar leje legalizimi dhe me ka hequr nga legalizimi kur unë jam banor i Tiranës.”

Si në rastin e Shkozës dhe Unazës Re, edhe këtu banorët theksojnë janë aty banorë që nga viti 2000 dhe ia kanë paguar taksat shtetit, ndërkohë që në vend të legalizimit po u dërgojnë fadromat për t’ua shembur shtëpitë:

“Kam që në vitin 2000 që jam këtu, kam 18 vjet dhe i kam paguar të gjitha. Do ta mbroj shtëpinë time qoftë edhe me gjak.

Banorët folën edhe për situatën absurde që është krijuar nga kryetari I bashkisë dhe kryeministri këtu në Bregun e Lumit: “A e shihni bulevardin?! Deri këtu janë shpronësuar. Ky është diskriminim, dallim i madh për ne. Kur deri këtu paguhet, pse këtej s’ka më shpronësim?! Atëherë, ta lërë kur nuk ka lekë për shpronësim!”