Brexit/ Selitë e kompanive për shërbime financiare me miliona vende pune ikin në BE…

Ikja e Britanisë nga Bashkimi Evropian për një kohë shumë të shkurtë do të shkaktojë transferimin e 12 mijë vendeve të punës në shërbimet financiare në BE, e shumë vende të tjera pune do të zhduken pas një kohe, ka bërë të ditur kreu i qarkut financiar të qendrës së ngushtë të Londrës.

Më shumë se dy milionë njerëz janë të punësuar në shërbimet financiare në Britani.

“Nuk presim ‘Brexodus’ të madh në fazën e parë. Por në vartësi të zhvillimit të situatës, mund të themi se do të ikin shumë prej tyre,” thekson Catherine McGuinness para Komisioit për daljen nga BE pranë parlamentit britanik.

Transferimi i selive nga Britania e Madhe

Bankat, kompanitë e sigurimeve dhe administratorët e pasurive në Britani kanë filluar të hapin selitë e tyre në BE, në prag të ikjes së Britanisë nga Bashkimi Evropian, marsin e vitit 2019, në mënyrë që të garantojnë vijimësinë në ofrimin e shërbimeve për klientët e tyre.

Në City-in londinez  janë të dëshpëruar që qeveria britanike ka hedhur poshtë opsionin që preferojnë, e sipas të cilit, marrëdhëniet e ardhshme tregtare me BE-në të bazohen në pranimin e ndërsjellë.

“Kemi pritur mbështetje në vijimësi për pranimin e ndërsjellë,” theksoi McGuinness.

Në vend të kësaj Britania ka kërkuar që aksesi në shërbimet financiare të bazohet në versionin fleksibël të sistemit ekuivalent të BE-së, siç e shfrytëzojnë Japonia dhe Shtetet e Bashkuara, ku Brukseli vendos vetë  se kush e gëzon aksesin në tregun e përbashkët. Për momentin nga Brukseli theksojnë se nuk do ta harmonizojnë sistemin ekuivalent në mënyrën që do ta dëshironte Britania.