Britania e Madhe i jep statusin e plotë diplomatik Ambasadorit të BE në Londër

Britania e Madhe i ka dhënë statusin e plotë diplomatik Ambasadorit të BE në Londër, duke i dhënë fund kontestit i cili ka acaruar marrëdhëniet në mes të dy palëve pas Brexitit.

Fillimisht Britania refuzoi ti jap statusin e ngjashëm diplomatik ambasadorit europian, Joao Vale de Almeida, siç u jep ambasadorëve të shteteve nacionale me arsyetimin se BE nuk është shtet.

Bashkimi Europian u përgjigj duke mos ftuar ambasadorin britanik në mbledhjet që u zhvilluan në Bruksel.

Kontesti u zgjidh në takimin që ministri britanik i Punëve të Jashtme, Dominic Raab, zhvilloi me shefin e diplomacisë europiane, Josep Borrell, në kulisat e Samitit të G7 që po mbahet në Londër.

“Me kënaqësi bëjë të ditur se kemi arritur marrëveshje, në bazë të vullnetit të mirë dhe pragmatizmit,” e bëri publike marrëveshjen Raab.

Ndryshe, sipas Konventës së Vjenës, i dërguari që përfaqëson një shtet ka privilegje të caktuara siç është imuniteti nga ndjekja penale dhe paraburgimi ose përjashtimi nga pagesa e tatimit.

Ndërkohë Komisioni Europian, si organ ekzekutiv i 27 shteteve anëtare, është shprehur se 143 delegacionet e saj nëpër botë kanë të njejtin status si misionet diplmatiket të shteteve nacionale.