Britania e Madhe shton Francën në listën e shteteve të karantinës

Mijëra pushues mund të kenë anuluar planet e tyre, pas vendimit të ri të Britanisë së Madhe për vendosje të Francës në listën e vendeve të karantinës.

Në vendim thuhet se udhëtarëve që kthehen nga Franca, Holanda, Monako, Malta dhe disa vende tjera, do t’iu duhet t’i nënshtrohen karantinës 14-ditore.

Ky lajm vjen pasi kryeministri francez, Jean Castex, tha se numri i të infektuarve është duke shkuar në drejtim të gabuar.

Të enjen, Franca ka raportuar 2.524 raste të reja me koronavirus brend 24 orëve, njëherësh shifrën më të lartë prej lehtësimit të masave të kufizimit në muajin maj.

Franca ka paralajmëruar se do marrë masa reciproke.

Sekretari francez për Çështje Evropiane, Clement Beaune, tha se vendimi britanik është fatkeq për francezët.

Aktualisht, raporton RFE, rreth 160.000 turistë britanikë janë në Francë, andaj ka mundësi që të ketë qarkullime të shumta në aeroporte, me qëllim të shmangies së karantinës.

Linjat ajrore në Mbretërinë e Bashkuar e kanë përshkruar këtë vendim si veprim shkatërrues ndaj industrisë së udhëtimit e cila edhe ashtu është duke u përballur me krizën më të keqe në historinë e saj.