Britania shpall zgjedhjet e përgjithshme më 12 dhjetor

Britania e Madhe do të mbajë zgjedhjet e përgjithshme më 12 dhjetor.

Deputetët e parlamentit britanik kanë miratuar legjislacionin e Kryeministrit Boris Johnson, për t’iu hapur rrugën zgjedhjeve të para që do të mbahen në muajin dhjetor prej vitit 1923. Megjithatë, ky projektligj duhet të miratohet edhe nga lordët, që më vonë do ta kthente këtë dokument në ligj deri në fund të javës, raporton RFE.

Në rast se ndodh një gjë e tillë, fushata zgjedhore do të zgjasë për pesë javë.

Kryeministri britanik tha se publiku duhet të zgjedhë për të ardhmen e Brexitit, apo largimit të Britanisë nga Bashkimi Evropian, por edhe të gjithë shtetit. Boris Johnson shpreson që zgjedhjet do t’i japin atij një tjetër mandat për t’i dhënë fund krizës në Britani rreth Brexitit, çka ka ndikuar në shtyrje të finalizimit të Brexitit deri më 31 janar të vitit të ardhshëm.

Nga ana tjetër, Lideri i laburistëve opozitarë, Jeremy Corbyn tha se këto zgjedhje janë mundësi që ndodh një herë në gjeneratë për të transformuar shtetin tonë. Sipas tij, Partia Laburiste do të lansojë fushatën më ambicioze dhe radikale për ndryshim të vërtetë që ka pasur Britania ndonjëherë.

Vendimi për largim të Britanisë nga blloku evropian ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.