Britania teston armën e re për shkatërrimin e dronëve
Ushtria e Mbretërisë së Bashkuar ka kryer testimin e parë të lazërit me fuqi të madhe kundër shënjestrave ajrore me armë që shfrytëzon “rreze intensive drite” për shkatërrimin e dronëve, raporton Sky News.
Ministria britanike e Mbrojtjes ka bërë të ditur se testimi më i ri i sistemit DragonFire shënon “një hap të madh për përdorimin real të kësaj teknologjie”. DragonFire është armë e cila mund të përcjellë çfarëdo lloj shënjestre që shihet me shpejtësinë e dritës, thekson Ministria e Mbrojtjes.
“Kjo lloj arme ka potencial të revolucionarizoj hapësirën ushtarake duke zvogëluar mbështetjen në armatim të shtrenjtë, dhe njëkohësisht ulë rrezikun nga dëmi kolateral,” tha ministri i Mbrojtjes, Grant Shapps.
Drejtori i Programit Strategjik në Ministrinë e Mbrojtjes, Shimon Fhima, sqaron:
“Në botën e kërcënimeve që po zhvillohet, fokusi jonë duhet të jetë aftësimi i ushtrisë, dhe do të bëjmë përpjekje që të përshpejtojmë fazat e ardhshme të aktivitetit.”
Zhvillimin e DragonFire e udhëheq Laboratori për shkencat e mbrojtjes dhe teknologjisë, Dstl, në emër të Ministrisë së Mbrojtjes dhe në bashkëpunim me partnerët industrial, MBDA, Leonardo dhe QinetiQ.
Sistemi i ri i armatimit është rezultat i investimit të përbashkët të Ministrisë së Mbrojtjes dhe partnerëve industrial me vlerë rreth 100 milionë paund.
