Bruksel, sot vazhdon dialogu Kosovë-Serbi

Sot në Bruksel mbahet takimi i radhës në nivel kryenegociatorësh ndërmjet Kosovës dhe Serbisë.

Delegacioni i Kosovës do të kryesohet nga Zv/Kryeministri i Kosovës, Besnik Bislimi, ndërsa ai i Serbisë nga Drejtori i Zyrës për Kosovës pranë Qeverisë së Serbisë, Petar Petkoviç.

Përfaqësuesit e delegacionit të Kosovës nga ora 11:00 do të kenë bisedime dypalëshe me Përfaqësuesi Special të BE për dialogun Kosovë-Serbi, Miroslav Lajçak ndërsa delegacioni serb me Lajçak në orën 9:30.

Nuk bëhet e ditur se çfarë do të jetë në Rendin e Ditës dhe nëse pas bisedimeve dypalëshe do të mbahet një takim trepalësh i dy delegacioneve me ndërmjetësuesit e BE-së.

Ndryshe, ministrat e Jashtëm të BE-së thanë dje në mbledhjen e Këshillit të BE në Bruksel se marrëveshjet e pazbatuara dhe detyrimet e paplotësuara nga marrëveshjet e mëparshme do të jenë në fokus të vazhdimit të dialogut.

Duke folur pas takimit të ministrave të Jashtëm të BE-së për situatën në Ballkanin Perëndimor, Përfaqësuesi i lartë për Politikë të Jashtme dhe Siguri pranë BE, Josep Borrell, tha se pret që udhëheqësit e Kosovës dhe Serbisë të takohen para fundit të vitit, në kuadër të dialogut për normalizimin e marrëdhënieve.

Kryeministri i Kosovës, Albin Kurti, dhe presidenti i Serbisë, Aleksandar Vuçiç, janë takuar për herë të fundit më 19 korrik, por pa arritur përparim në ndonjërën prej çështjeve kontestuese.