Bruksel, Veseli: Raporti për vizat do të jetë pozitiv

Pas përfundimit të takimit të delegacionit nga Kosova me Përfaqësuesen e Lartë për Politikë të Jashtme dhe Siguri pranë BE-së, Federica Mogherini, kryetari i Parlamentit, Kadri Veseli tha se raporti  për vizat do të jetë pozitiv, ndërsa kryeministri Ramush Haradinaj beson se deri në fund të vitit do të lëvizin lirshëm në zonën Shengen.

“Lajm shumë i mirë. Në orën 11:30, eurokomisioneri Avrampolus do ta japë lajmin pozitiv. Rekomandimi pozitiv është për liberalizimin e vizave për qytetarët tanë. Ky është hapi i parë, është hapi historik. Në të njëjtën kohë të gjithë ishim në takim me komisioneren Mogerini, për të treguar se jemi unik në dialog, si shtet i pavarur dhe sovran. Dhe nga dialogu presim që Kosova të jetë anëtare e Organizatës të Kombeve të Bashkuara. Presim njohjen e shtetit të pavarur nga Republika e Serbisë”, tha Veseli.

Ai tha se pala kosovare do paqe dhe perspektivë në Kosovë dhe në Serbi, por natyrisht si dy shtete të pavarura. Veseli shpreson se në këto takime shumë shpejt do të jetë edhe opozita.

“Presidenti i vendit është figura unifikuese e cila na përfaqëson. Jemi në takime intensive. Edhe opozitën do ta kemi shumë shpejt në këto takime. Tjetrën herë shihemi edhe me opozitën. Për Kosovë jemi të gjithë bashkë. Pozitë dhe opozitë”, tha Veseli

Pas delegacionit nga Kosova me Mogherinin pritet që presidenti Hashim Thaçi gjatë ditës të takohet edhe me presidentin e Serbisë, Aleksandër Vuçiç.

Kocijançiç: Diskutim për liberalizim të vizave dhe progresin drejtë BE

Në momentin kur kishte filluar takimi, Zëdhënësja e Komisionit Europian për Politika Fqinjësore dhe Negociata të Zgjerimit, Maja Kocijançiç, ka publikuar dy fotografi në llogarinë e saj në Tëitter, ku shihet delegacioni kosovar në takim me Përfaqësuesen e Lartë të BE-së, Federica Mogherini.

Në postimin e saj në Twitter, Kocijançiç thekson se temë e këtij takimi është dialogu dhe liberalizimi.

“Federica Mogherini takon Hashim Thaçin, Ramush Haradinajn, Kadri Veselin dhe Behgjet Pacollin, si dhe delegacionin kosovar të dialogut, por po ashtu që ta diskutojë perspektivën për liberalizim të vizave dhe progresit në rrugën drejt BE-së”, thekson Kocijançiç

Ndryshe, pas publikimit të raportit sot nga Komisioni Evropian, vendimi duhet të merret nga Parlamenti Evropian dhe Këshilli i Ministrave.

Ndërkohë nesër në Kosovë pritet të vijë komisioneri për Punë të Brendshme dhe Migracion i BE-së, Dimitris Avramopoulos ku do ti drejtohet Parlamentit të Kosovës.