Budapest, qytetarët votojnë kundër qirave afatshkurta, duan qetësi
Banorët e qarkut të gjashtë në Budapest votuan kundër qirave afatshkurta të apartamenteve duke filluar të paktën nga viti 2026, vendim nga i cili mund të kenë pasoja tregu i pasurive të paluajtshme në njërin prej vendeve më popullore në Evropë.
Të dhënat e Eurostat tregojnë se vitin e kaluar rreth 719 milionë netë qëndrimi në Bashkimin Europian është rezervuar përmes platformave online Airbnb, Booking, Expedia Group dhe Tripadvisor, e Parisi kryeson nga kryeqendrat e BE me mbi 19 milionë netë qëndrimi.
Në Evropën Qendrore, Budapesti ishte më popullori me qiratë afatshkurta me 6.7 milionë netë qëndrimi duke konkurruar edhe Vjenën, Pragën, Varshavën, Krakowën etj.
Ndikimi në cilësinë jetës
Rezultatet e publikuara sot në web faqen e qarkut në Budapest tregojnë se 54 për qind e qytetarëve mbështet ndalimin e qirave afatshkurta, ndërsa pjesëmarrja ishte 20.52 për qind, që është një nivel shumë i lartë në krahasim me iniciativat tjera qytetare.
“Kjo që shumica kanë votuar PER tregon se qytetarët e qarkut vlerësojnë qetësinë e shtëpisë së tyre më shumë se të ardhurat e humbura,” thuhet në komunikatën e Këshillit Bashkiak.
Kryebashkiaku Tamas Soproni tha se popullariteti i qytetit arsyeton pyetjen që parashtruan qytetarët mbi ndikimin e qirave afatshkurta në aksesin e akomodimit dhe cilësinë e jetesës.
Kundërshtarët e këtij ndalimi thanë se ky vendim do të godiste të ardhurat jo vetëm të pronarëve të apartamenteve, por dhe bar-kafeve dhe restoranteve që kryesisht shërbejnë turistët e huaj.
Rezultati i këtij votimi mund të ketë pasoja shumë më të gjëra për qeverin e Viktor Orban e cila po shqyrton Rregulloren për qiranë afatshkurtër, për të cilën ministri i Ekonomisë thotë se kontribuon në mungesën e hapësirës së banimit dhe çmimet e larta.
Web faqja e pasurive të paluajtshme ingatlan.com ka publikuar javën e kaluar lajmin se gjatë muajit të kaluar, oferta për shitjen e apartamenteve luksoze në qarkun e gjashtë është rritur me rreth 3 për qind, me një ulje të çmimeve me 1 për qind, që mund të jetë dhe shenjë e rezultatit të pritshëm të votimit.
