Bugajski: Beogradi do të përpiqet t’i zgjerojë qëllimet hegjemoniste në raj

Analisti amerikan dhe bashkëpunëtor i lartë në Fondacionin Jamestown në Washington, Janusz Bugajski, tha se Serbia do të përpiqet të zgjerojë qëllimet e saj hegjemoniste, duke dominuar apo destabilizuar qeveritë fqinje në Sarajevë, Prishtinë dhe Podgoricë.

Sipas tij, shumica sovrane në Mal të Zi duhet të përgatitet për t’u mbrojtur në mënyrë më efektive kundër çdo përmbysjeje më të gjerë të pavarësisë së vendit.

Për mediat malazeze Bugajski thekson se projekti i “Serbisë së Madhe” mund të luftohet edhe duke bashkëpunuar me vendet e tjera të synuara, veçanërisht me Bosnje Hercegovinën dhe Kosovën.

Duke iu referuar zgjedhjeve të mbajtura së fundmi në Serbi, ku partia e Aleksandar Vuçiçit përsëri fitoi numrin më të madh të votave, Janusz Bugajski ka shpreh besimin se rezultatet do ta detyrojnë qeverinë e Vuçiçit të intensifikojë agjendën e saj mini-imperialiste në Ballkanin Perëndimor.

Synimi i Serbisë, siç thotë ai, është që Mali i Zi të bëhet një shtet vasal që do të ndjekë politikën e jashtme dhe të sigurisë së Serbisë dhe jo ta sfidojë Beogradin në skenën ndërkombëtare.