Bujqësia në rrezik, Berisha: Ballkani i Hapur do të falimentojë masivisht fermat tona!

E shpërfillur nga qeveria, ku zubvencionet vidhen dhe fermerët ndëshkohen, duke konstatuar se bujqësia është në rrezik, Kryetari i Partisë Demokratike, Sali Berisha, në një bashkëbisedim me fermerët paralajmëron se “Ballkani i Hapur” do të falimentojë masivisht fermat shqiptare

Zotimin e Ramës për bujqësinë, “100 fermat”, Berisha e cilësoi si mashtrim dhe propagandë që në fakt është “100 fermat e Saimir Tahirit me shokë” ndërsa ftoi fermerët që të ngriten në protesta për të larguar qeverinë sa më shpejt sepse jemi në rrezik të madh, në rrezik të vërtetë ekzistencial.

“Ky sektor është në rrudhje, në rënie, në rrokullisje. Është jashtë çdo dyshimi sektori më i papërfillur nga qeveria, por mospërfillja është njëra anë, ndëshkimi është ana tjetër dhe ky është një nga sektorët më kryesor të ekonomisë tonë, që jep mbi 20% të PBB, që punëson mbi 50% të forcës punëtore të grave dhe 35% të burrave në vend.

Sektor që në vend se të zhvillohet, të fuqizohet, të mbështetet ka një rënie të madhe me pasoja shumë të rënda për vendin.

Bujqësia është sektori i cili në të gjitha produktet e saj meriton dhe ka të domosdoshëm subvencionin. Subvencioni në bujqësi nuk është një humbje financiare, por është një histori fitimi për të gjitha palët, është histori fitimi sepse ai që merr subvencionin ndihmohet për një sukses më të madh, më të garantuar, mëkëmbja e tij është një interes direkt jo vetëm i familjes por i shoqërisë në tërësi. Është në interes të mbarë shoqërisë sepse prodhimi, sepse eksporti janë faktorë jashtëzakonisht të rëndësishëm në krijimin e balancave për një ekonomi të qëndrueshme,” tha Sali Berisha duke shtuar se kjo qeveri mban një qëndrim armiqësor ndaj fermerëve dhe bujqësisë.

“Mund t’ju duket i ashpër ky term, por jo nuk është, sepse nëse ai në sistemin fiskal ndëshkon fermerët, ai sillet si ta si një pushtues, jo si institucion i ligjit, nuk respekton ligjin, nuk respekton ato parime që janë të domosdoshme për një shtet ligjor. Ndërperja e subvencioneve është njëra anë, por kjo vendos fermerët shqiptarë në kushte të pabarabarta me fermerët e vendeve përreth, për të mos thënë me fermerët e BE. Taksimi i njëanshëm me TVSH përbën një ndëshkim tjetër madho për fermerët. Mungesa e stimulit për eksportet është një akt tjetër i papërgjegjshëm i kësaj qeverie.”

Me këtë rast Berisha sqaroi rrezikun që vjen nga Ballkani i Hapur:

“Hapja e doganave në kuadër të “Ballkanit të Hapur” do të shënojë masivisht falimentimin e fermave tona. Vetëm brenda një viti janë rritur me 250% importet e prodhimeve bujqësore nga Serbia. Në një kohë kur subvencionet aktuale dhe në dekada për fermerët e ish-Jugosllavisë kanë qenë qindra herë më të mëdha se ato thërrimet që mund të kenë marrë fermerët shqiptarë.”

Duke konstatuar bujqësinë që është në rënie, Kryetari i PD thotë se edhe në bujqësi kjo qeveri ka mashtrimin dhe propagandën, siç është rasti me 100 fermat.

“Në rënie të madhe është blegtoria. Nga viti 2018 sipas statistikave të qeverisë janë më pak sot 130 mijë kokë lopë, janë mbi 300 mijë dele, 220 mijë dhi e me radhë. Në total janë 640 mijë lopë, dele, dhi, derra më pak sot se sa ishin në vitin 2018. Të gjitha këto për shkak të çregullimit të madh të tregut. Për shkak të injorimit plotë të fermerit, mungesës së subvencioneve për kokë, për prodhim.

Kjo qeveri, si në çdo sektor edhe në bujqësi ka dy mantra, mashtrimin dhe propagandën. 100 ferma thotë, 100 ferma të nomeklaturës socialiste të Saimir Tahirëve me shokë. Ky ishte zotimi i saj për bujqësinë. Ndërkohë, hapja e doganave, hapja e kufijve jashtë çdo lloj standardi, BE është me përcaktim bashkim në tregtinë e lirë, por me kuota. Edhe me kuota në periudha të caktuara, me marrëveshje të heshtur shesin njëherë të vetat dhe pastaj hapen për te tjerët. Greqia në periudhë të caktuar nuk pranon mollë, do të shesë njëherë mollët e veta, pastaj do të vijnë mollët e tjera. Këtë patëm filluar ta bëjmë edhe ne. Kurse tani prodhimeve u thotë do krijojmë gropat e mëdha se po nda ndotin mjedisin. I hoqi projektet e subvencionit dhe i marrin e i çojnë, i ndajnë me ata që i financojnë, vjedhin dhe tallen me bujqësinë. Kosova në fillim të luftës, përveç subvencionit të zakonshëm shpalli se për një ha grurë do të subvencionojmë 400 euro. Këta pritën pasi u korr gruri të thonë se do subvencionojnë 30 mijë lekë,” tha Berisha duke shtuar s’ka marrë kush as subvencion, as naftë, vetëm vjedhin.”

I pashmangshëm në këtë bashkëbisedim me fermerët ishte problemi i vaditjes, që ndonëse Shqipëria është një vend plot ujë, programet e vaditjes janë një dështim spektakolar.

“Në vitin 2013 u lanë të gatshme 140 milionë euro me Bankën Botërore për vaditje. Askush nuk di se çfarë u bë me to. HEC-i i Banjës u ndërtua me kushtin që të ishte edhe një vepër e madhe vaditëse, sikurse edhe energjetike. Nuk është bërë asgjë për fillimin e një impianti apo të kanaleve për të shfrytëzuar këtë digë për vaditje.”

Shqipëria mund të bëhet konkurruese në dru frutorë, është i bindur edhe sot Sali Berisha dhe tregu qoftë i ullirit, qoftë i druve frutë është i pafund në Europë.

“Sot unë e di që ka fermerë që kanë tonelata vaji, sepse ky mban qëndrim armiqësor, kjo qeveri e nisi si armike ndaj ullirit dhe vazhdon me armiqësi. E mbani mend në Berat kur u thoshte i keni mbushur banjot me fuçi me ullinj. Çdo qeveri bën një politikë, nëse nuk i shitet e subvencionon. Mobilizon të gjithë diplomacinë tënde për ta shitur.

Në 1992 erdhi këtu kryeministri i Malajzisë, ne ishim siç ishim, tha nëse dëshironi të bleni vaj palme, ua japim me çmim shumë të leverdisshëm, ishte prodhues kryesor në atë kohë. Më tregon se ç’po bënte për të shitur vajin e palmës, edhe me klering, diku merrte klering, diku tanke dhe i paguante me vaj palme. Të mbetet ulliri pa shitur kjo mbetet një fatkeqësi sepse tregu për ullirin është i pafund,” tha Kryetari i Partisë Demokratike duke u zotuar për një strategji kombëtare për bujqësinë me ardhjen në pushtet, subvencione për fermerët dhe rritje të buxhetit mbi 5 për qind.

“Është e domosdoshme një strategji kombëtare për bujqësinë e cila të përcaktojë drejtimet kryesore të zhvillimit të bujqësisë së vendit. Ne do vazhdojmë me projekte kombëtare.

Bujqësia në çdo prodhim duhet të ketë subvencionon. Është e faktuar se subvencioni në bujqësi është fitim për të gjitha palët, nuk është humbje për shtetin, është fitim për individin, fitim për shtetin, fitim për shoqërinë. Subvencionin që jep Maqedonia, Mali i Zi, Serbia, që jep Kosova, absolutisht ne do ta realizojmë pa asnjë hezitim. Sikundër do të rrisim buxhetin mbi 5%. Kjo rritje e buxhetit rikthehet në të ardhura po për buxhetin, përmirëson gjendjen ekonoimike të fermerëve, përmirëson bilancin e pagesave duke përmirësuar eksportin.”

Në fund, duke konkluduar se Bujqësia është në rrezik, në rrezik të vërtetë ekzistencial, ai i bëri thirrje fermerëve të bashkohen që rrëzojnë së bashku, një orë e më parë, këtë qeveri.

“Nëse ne nuk e largojmë këtë qeveri sa më shpejt, në mbledhjen tjetër nuk do të bëjmë gjë tjetër veçse të vajtojmë më shumë se kaq. Ndaj duhet të ngrihemi. Sot janë me dhjetëra e mijëra biznese që po shkojnë drejt falimentim, po ulin qepenat. Sot janë dhjetëra e mijëra fermerë që po shkojnë drejt falimentimit. Ka vetëm një rrugë protestë dhe vetëm protestë, ta largojmë. Kjo është një qeveri që nuk përfill qytetarët shqiptarë. Ju e thatë buikur këtu, as na ka pyetur. Cilido që të pyesësh, a ju ka pyetur kush për këtë ligj apo këtë vendim. Absolutisht jo! Asnjëherë! Ky vend nuk ka patur asnjëherë kryeministër më të dobët se ky njeri. Ky, përveçse mashtron çdo ditë, përveçse tregon cinizëm dhe shpërfillje, nuk pasqyron as nocionet më elementare të dijes në një fushë të caktuar. Thotë bujqësia po ecën shumë mirë, po përfiton bujqësia nga ballkani i hapur, turizmi është më i përsosur…turizmi është në terr. Rendi i shkëlqyer…çdo ditë vriten dhe përgjaken vendet tona,” tha Kryetari i PD, Sali Berisha, duke përfunduar:

“Të ngrihemi sepse jemi në rrezik të madh, në rrezik të vërtetë ekzistencial. Një komb që në 6 vite largohen 744 mijë qytetarë. Unë kam besim se me vullnet, me guxim dhe me vendosmëri ne do t’i tregojmë vendin kësaj qeverie dhe ju garantoj se do realizojmë plotësisht të gjitha projektet dhe platformat për bujqësinë.”