Buka e Serbisë

nga Luçiano Boçi

Dikur diktatori Hoxha me pompozitet deklaronte se ne “grekët i kemi mbajtur me bukë”.

Bëhej fjalë për një ndihmë me grurë të dhënë në 1967, në fillimet e vendosjes së diktaturës atje. Shpesh ky fakt i dëgjuar na bënte pse jo dhe krenarë, në vitet e vështira të eksodeve drejt Greqisë. Hoxha kishte qëllimet e veta politike, se buka e falur sipas ligjeve të moralit shqiptar, nuk përmendet, por të paktën ishte një ndihmë e duhur.

Ndërsa sot m’u desh të dëgjoj Ramën. Tani në një rend të përmbysur të gjërave:

“SERBIA DO NA JAPË GRURË, falë Ballkanit të hapur”.

Deklarata ngjan e fryrë me estetikë tronditëse.

Por brenda ka gjëmë propagande dhe turp njëherazi.Së pari: Serbia ka detyrimin të plotësojë një marrëveshje tregtare midis bizneseve që operojnë në këtë fushë.

Merita këtu i takon biznesit, i cili dhe po s’e gjeti grurin në Serbi do e gjejë në vend tjetër.

Nëse është shtrenjtë Rama ka për detyrë ta kompesojë. Pikë.

Këtë të bëjë, jo hosanara serbomadhe.

Ndërkohë që nuk heq as TVSH për produktet bazë!

Së dyti: Vuçiç nuk po fal gjë nëse e marrim në kontekst më të gjërë. Po na e shet. Po e shet në bazë të përfitimit të vet. Sa frëngu pulën.

Së treti: Rama do bënte mirë të heshtë e mos të tregojë përralla me “Open Ballkan”, nisma që na bëka “të sigurojmë bukën në vend” falë Vuçiçit.

Së katërti: Në vend të vazhdojë të lobojë për pamjen evropiane të Serbisë e ta paraqesë atë si pro ukrainase, do bënte mirë që t’i kërkonte asaj si akt njohjen e KOSOVËS, dhe jo të shpërndajë dërdëllisje diktatoriale qesharake.

Rama vetë sot ngjan me atë bukën e dhënë me shpinën e dorës!